पोखराको तीन स्थानमा बम भेटियो
काठमाडौं, १० असार । प्रतिबन्धित नेत्रविक्रम चन्द ‘विप्लव’ ले आज आह्वान गरेको बन्दका दिन पोखराका तीन स्थानमा बम भेटिएका छन् ।
पोखराको विजयपुरको पुल पारी ओरालोमा प्रेसरकुकर बम फेला परेको छ । बमलाई नेपाली सेनाको टोलीले डिस्पोजको तयारी गरिरहेको कास्कीका प्रहरी प्रमुख एसपी दानबहादुर कार्कीले जानकारी दिएका छन् ।
प्रहरीले प्रेसरकुकर बम भेटिएको ठाउँलाई सुरक्षा घेरामा राखेको छ । त्यसैगरी पोखरा महानगरपालिका लेखनाथको हमाल चोकमा भटिएको सकेट बम सेनाले डिस्पोज गरेको छ ।
यस्तै पोखरा १७ ड्यामसाइडमा पनि शंकास्पद बस्तु भेटिएको प्रहरीले जानकारी दिएको छ । विप्लव माओवादीले आफ्ना सर्लाही जिल्ला इञ्चार्ज कुमार पौडेलको हत्या हत्या गरिएको विरोधमा नेपाल बन्दको आव्हान गरेको हो ।
बन्दका कारण पोखरामा पनि सार्वजनिक बस सञ्चालनमा नआए पनि निजी सवारी साधन भने चलिरहेका छन् । स्कुल कलेज, पसल र कलकारखना भने बन्द छन् ।
