साहिदीले आमालाई पीडा नहुन् भनेर मैदानमा आफनो चोट लुकाए
काठमाडौं, १० असार (एजेन्सी) । अहिले भइरहेको विश्वकपको इङ्ल्यान्ड र अफगानिस्तानबीचको खेलमा अफगानिस्तानका ब्याट्सम्यान हसमतुल्लाह साहिदीले चोट लागेको थियो । तर उनले मैदान त्यो चोट लुकाए । जुन खेलको क्रममा भएको एउटा गम्भीर घटनाले भने यतिबेला क्रिकेट विश्लेषकहरूको ध्यान तानेको छ ।
जुन खेलमा इङ्ल्यान्डले अफगानिस्तानलाई एक सय ५० रनले हरायो । घरेलु टोली इङ्ल्यान्डले अघि सारेको तीन सय ९८ रनको विशाल विजयलक्ष्य पछ्याउँदै थियो । अफगानिस्तान ३०औं ओभरको खेल चलिरहेको थियो । अफगानिस्तानका ब्याट्सम्यान हसमतुल्लाह साहिदी क्रिजमा थिए । त्यतिबेला उनी २४ रन बनाएर खेलिरहेका थिए । इङ्ल्यान्डका मार्क उड बलिङमा थिए। मार्क उडले तीव्रगतिमा फालेको एउटा ‘सर्ट पिच’ बल सीधै गएर हसमतुल्लाहको टाउकोमा ठोक्कियो
।
हेलमेट लगाएको भए पनि बल टाउकोमा ठोक्किएपछि हसमतुल्लाह रन्थनिएर क्रिजमा ढले। मार्क उडले फालेको बल एक सय ४५ किलोमिटर प्रतिघण्टाको गतिमा उनको टाउकोमा ठोक्किएको थियो । तत्काल चिकित्सकले मैदानमै उनको सामान्य उपचार गरे । त्यसपछि चिकित्सक, अम्पायर र टोलीका पदाधिकारीले पनि उनलाई नखेल्न सल्लाह दिए ।
तर, उनले कसैको भनाइ सुनेनन् र पुनः ब्याटिङ गर्ने आफ्नो अडान कायम राखे। लगत्तै उनी ब्याटिङका लागि क्रिजमा फर्किए । असहज रूपमा ब्याटिङ गर्दै उनले ७६ रन बनाए ।
त्यसैले खेल अधिकारीहरू हसमतुल्लाहको चोटबाट त्रसित बनेका थिए । खेल सकिएपछि उनलाई थप स्वास्थ्य परीक्षणका लागि अस्पताल लगियो । धेरैले हसमतुल्लाहलाई गम्भिर चोट लाग्दा पनि खेल नछाड्नुको कारण बारे प्रश्न गरे। हसमतुल्लाहले खेल नछाडनुको पछाडि जुन कारण दिए त्यो झनै रोचक छ। उनले आफ्नी आमालाई पीडा नहोस् भन्ने उद्देश्यले खेल नछाडेको बताए।
‘आमा टेलिभिजन अगाडि बसेर मेरो हरेक खेल हेर्नुहुन्छ। त्यो खेल पनि उहाँले पक्कै हेर्नु भएको थियो। यदि मलाई तत्काल अस्पताल लगिएको भए उहाँलाई निकै पीडा हुने थियो। त्यसैले चोट सहेर पनि मैले खेललाई निरन्तरता दिएको हुँ’, २४ वर्षीय हसमतुल्लाहले भने। एक वर्षअघिमात्र आफ्नो पिताको निधन भएकाले आफूले आमालाई थप पीडित बनाउन नचाहेको पनि बताए।
