‘फ्रि तिब्बत’ कार्यक्रममा सहभागी सांसद यादवलाई निलम्वन गर्ने समाजवादीको निर्णय
केन्द्रीय कार्यालय, निकाय तथा बिभागको जिम्मेवारी बाँडफाँड
सन्तोष शाह
काठमाडौं, १० असार : समाजवादी पार्टी नेपालले सांसद तथा पर्सा जिल्ला कमिटीका अध्यक्ष प्रदिप यादवलाई निलम्बन गरेको छ ।
पार्टीको केन्द्रीय कार्यालय बालकुमारीमा मंगलबार बसेको केन्द्रीय कार्यकारिणी समितिको बैठकले यादवलाई ६ महिनाका लागि पार्टीको सम्पुर्ण जिम्मेवारीबाट निलम्बन गर्ने निर्णय गरेको हो ।
समाजवादी पार्टीका उपमहासचिव तथा केन्द्रीय कार्यालय प्रमुख प्रकाश अधिकारीका अनुसार पार्टीको नीति विपरित ‘फ्रि तिब्बत’ कार्यक्रममा सहभागि भएकाले यादवलाई निलम्बन गरिएको बताए ।
लाटभीया देशको राजधानी रिगामा हालै सम्पन्न भएको ‘इन्टरनेश्नल नेटवर्क अफ पारलियामेन्टेरियन अन फ्रि तिब्बत’ कार्यक्रममा सांसद यादव सहभागि भएका थिए । पार्टीलाई जानकारी नगराई भाग लिन गएका सांसद यादवसंग पार्टीले स्पष्टिकरण सोधेको थियो । तर चितबुझ्दो स्पष्टिकरण नदिएकाले पार्टीले कारवाही गर्ने निर्णय गरेको अधिकारीले बताए ।
यसैगरी बैठकले पार्टीको केन्द्रीय कार्यालय, निकाय तथा बिभागको जिम्मेवारी बाँडफाँड गरेको छ । तत्कालिन संघीय समाजवादी फोरम नेपाल र नयाँ शक्ति पार्टीका बीचमा एकिकरण भएपछि ती निकायहरूमा सहमतिका आधारमा जिम्मेवारी बाँडफाँड गरिएको महासचिव रामसहाय यादवले बताए ।
पार्टीको केन्द्रीय कार्यालय प्रमुखमा उपमहासचिव प्रकाश अधिकारी, प्रचार बिभागमा सचिव प्रशान्त सिंह, अर्थ बिभागमा कोषाध्यक्ष बिजय यादवलाई जिम्मेवारी दिइएको महासचिव यादवले बताए ।
यसैगरी पार्टीको बिज्ञ परिषद प्रमुखमा डा. पुष्पराज राजकर्णिकार र केन्द्रीय सल्लाहकार समिति प्रमुखमा भीमप्रसाद गौतमलाई जिम्मेवारी दिईएको छ ।
बैठकले राष्ट्रिय जनता पार्टी नेपाल (राजपा) संग पार्टी एकताका लागि छलफल अगाडी बढाउँने बिषयमा छलफल गरेको छ । बैकल्पिक शक्ति निर्माणका लागि बिचार, सिद्धान्त मिल्ने पार्टीसंग एकताका लागि छलफल अगाडी बढाउँने बिषयमा बैठकमा छलफल भएको समाजवादी पार्टीका नेताले बताए ।
संबिधान संशोधन सहितका सर्त सहित सरकारमा सहभागि समाजवादी पार्टीले सरकारलाई संशोधनका लागि दबाब दिने तयारी गरेको छ । बैठकको एजेण्डा संशोधन नबनाईएको भए पनि सो बिषयमा समान्य छलफल भएको बताईएको छ । संशोधनको एजेण्डा बिषयमा अर्को बैठकमा छलफल गरी अगाडी बढने नेताहरुले बताए ।