‘बीआरआई’ विरुद्ध फैलाइएको भ्रम चिर्न नेपाल तयार छ : नेता खनाल


७ भाद्र २०७६, शनिबार
Jhalnath Khanal Nekapa

काठमाडौं, ७ भदौं । नेपाल कम्युनिष्ट पार्टी (नेकपा) का वरिष्ठ नेता झलनाथ खनालले चिनियाँ राष्ट्रपतिले अघि सारेको बेल्ट एण्ड रोड इनिसियटिभ (बीआरआई) परियोजनालाई असफल बनाउन चालिएका कदमविरुद्ध लड्न नेपाल राजनीतिक रुपमा तयार रहेको बताएका छन् ।

चीनमा आयोजना गरिएको ‘गुआङडोङ २१ औं शताब्दी म्यारीटाइम सिल्करोड अन्तर्राष्ट्रिय एक्स्पो’ लाई सम्बोधन गर्दै पूर्व प्रधानमन्त्री खनालले दक्षिण एसियामा बीआरआईकाविरुद्ध लक्षित गर्दै चलेका अभियानको कुनै अर्थ नभएको टिप्पणी गरेका छन् ।

उनले त्यस्ता अफवाहविरुद्ध एक भएर लड्न नेपाल तयार रहेको बताए । नेता खनाल चिनियाँ सरकारको निमन्त्रणमा चार दिने चीन भ्रमणमा छन् । नेता खनालले सन् २०१७ मा बीआरआईमा नेपाल र चीनबीच भएको समझदारीपछि नेपाल औपचारिक रुपमा बीआरआईमा सहभागी हुने मुलुक बनेको बताए ।

उनले समझदारीपूर्व विभिन्न चरणमा द्विपक्षीयरुपमा विभिन्न समझदारी भएको स्मरण गरे । ती समझदारीपत्र बीआरआईको आधारपत्र तयार गर्न सहायक भएको उनको भनाइ थियो ।
नेपाल र चीनबीच एक हजार ६०० वर्ष पुरानो सम्बन्ध रहेको उल्लेख गर्दै नेता खनालले अब सांस्कृतिक र व्यापारिक आधारमा नेपाल र चीनबीचको सम्बन्ध विकास गरिनुपर्नेमा जोड दिए । बीआरआईको प्रभावकारी कार्यान्वयनका लागि नेपाल–चीन आर्थिक करिडोरको विकास गर्न उनले प्रस्ताव गरे ।

त्यसैगरी, ‘ट्रान्स हिमालय इकोनोमी करिडोर’को स्थापना र नेपाल चीनबीचको रेल सञ्जालको सम्बन्धले ‘सिल्क रोड’ को ल्हासा–काठमाडौं–भारत खण्डलाई पुनः जीवित पार्ने र जसको लाभ नेपालले लिनसक्ने उनको भनाइ थियो । सम्बोधनका क्रममा नेता खनालले नेपाल र चीनबीचको ऐतिहासिक सम्बन्धकाबारेमा स्मरण गरेका थिए ।

‘काठमाडौंको सांस्कृतिक उत्कृष्टता चीनले आयात गरेको थियो । जुन आज पनि बेइजिङको सेतो प्यागोडाशैलीमा देख्न सकिन्छ । जुन अरनिकोद्वारा निर्माण गरिएको थियो’–उनले भने ।

उनले दुई देशबीच गहिरो सांस्कृतिक तथा आर्थिक सम्बन्ध रहेको र इतिहासको विभिन्न कालखन्डमा दुई देशबीच वैवाहिक सम्बन्ध समेत स्थापित भएको उल्लेख गरे ।

पूर्व प्रधानमन्त्री खनालले अर्थतन्त्र, वातावरण संरक्षण, प्रविधि हस्तान्तरण, संस्कृति आदान–प्रदानलगायत क्षेत्रमा दुवै देशले सहकार्य गर्नसक्ने प्रशस्त सम्भावना रहेको बताए ।

‘आज नेपालले आर्थिक समृद्धि चाहेको छ । जुन दुई देशबीचको आर्थिक तथा सामाजिक सम्बन्धका आधारमा विकसित हुनसक्छ’–उनले भने–‘कर नीति, कानुन, नीति–नियम र मुद्राको आदान–प्रदानको सीधा प्रणालीलाई सहज बनाउने र अन्य गतिविधिमा दुई देशबीच एक समझदारी हुनु आवश्यक छ ।’

चीनमा आयोजित अर्को एक कार्यक्रममा उनले पर्यावरणको संरक्षण, हिमाली क्षेत्रमा बढ्दो मौसम परिवर्तन र वातावरणीय मुद्दालाई दुवै मुलुकले एकसाथ सम्बोधन गर्नुपर्नेमा जोड दिएका थिए ।
उनले नेपाल–चीनबीच कृषि तथा चिया, पर्यटन र अन्य विविध क्षेत्रमा द्विपक्षीय सहयोग आदान–प्रदान हुनसक्ने औंल्याए ।

नेपाल सरकारले घोषणा गरेको भ्रमण वर्ष २०२० सफल बनाउन चीन सरकारको सहयोगको अपेक्षा गर्दै उनले नेपालले चिनियाँ पर्यटकलाई दिनसक्ने सुविधाकाबारेमा दुई देशकाबीच सहकार्य गर्न सकिने बताए । पूर्व प्रधानमन्त्री खनाल आजै स्वदेश फर्कने उनका स्वकीय सचिव कृष्ण भट्टराईले जानकारी दिएका छन् ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७