नेकपा विदेश मामिला विभागको उपप्रमुखमा रिजाल
काठमाडौं, ९ भदौ : सत्तारुढ नेपाल कम्युनिष्ट पार्टी (नेकपा) केन्द्रीय सदस्य विष्णु रिजाललाई पार्टीको विदेश मामिला विभागको उपप्रमुखको जिम्मेवारी दिइएको छ ।
पूर्व प्रधानमन्त्री तथा वरिष्ठ नेता माधवकुमार नेपाल प्रमुख रहेको विदेश मामिला विभागको उपप्रमुखमा रिजाल नियुक्त भएका हुन् ।
नेकपा मुख्यालय धूम्बारहीमा अध्यक्ष प्रचण्डको अध्यक्षतामा सोमबार वसेको वैठकले रिजाललाई उपप्रमुखमा नियुक्त गर्ने निर्णय गरेको हो । यसअघि रिजाल तत्कालिन नेकपा (एमाले)को प्रचार मोर्चाको जिम्मेवारी थिए ।
तत्कालिन एमालेको प्रचार विभागका केन्द्रीय सचिव तथा राजनीतिक मुखपत्र ‘नवयुग’का कार्यकारी सम्पादकको जिम्मेवारी रहेका रिजाल लामो समयदेखि लेखन र पत्रकारितामा समेत संग्लन छन् ।
विदेश मामिलामा लामो समयदेखि कलम चलाउँदै आएका रिजालको सम्पादनमा ‘नेपालको कूटनीतिक अभ्यासः राजदूतको अनुभव’ नामक पुस्तक समेत भर्खरै प्रकाशित भएको थियो । रिजाल तात्कालिन प्रधानमन्त्री नेपालका प्रेस सल्लाहकार थिए ।
