हल सिटीका डिफेन्डर म्याकडोनाल्डलाई आन्द्राको क्यान्सर
काठमाडौं, १९ भदौं । इङलिस प्रिमियर लिग क्लब हल सिटीले आफ्ना डिफेन्डर एंगस म्याकडोनाल्डलाई आन्द्राको क्यान्सर भएको पुष्टि गरेको छ ।
२६ वर्षीय म्याकडोनाल्डको क्यान्सर पहिलो चरणको हो । क्यान्सरको खबर सुनेदेखि नै उनले आफूलाई लागेको रोगसँग लड्न सकारात्मक सोचको विकास गरेकोमा हल सिटीले खुशी व्यक्त गरेको छ ।
प्रेमिका अलेजान्द्रा बुर्केको ३१ औं जन्मदिन मनाएको केवल २ दिनपछि उनलाई क्यान्सर भएको पत्ता लागेको हो ।
‘एंगस म्याकडोनाल्डलाई आन्द्राको क्यान्सर भएको सुन्दा हामीलाई दुःख लागेको छ । उनको बिमारी शुरुवाती चरणमा छ र उपचार भइरहेको छ,’ क्लबले जारी गरेको विज्ञप्तिमा भनिएको छ, ‘एंगसले यस खवरपछि जस्तो प्रतिक्रिया दिए त्यसले उनको सकारात्मक सोचलाई प्रतिबिम्बित थरेको छ । उनको शारीरिक र मानसिक स्वास्थ्य हाम्रो पहिलो प्राथमिकता हो ।’
क्लबले एंगसको परिवार र गोपनियताको सम्मान गर्न समर्थक र सञ्चारमाध्यमलाई अनुरोध गरेको छ । उनको स्वास्थ्य अवस्थाबारेको अपटेड क्लब आफैंले सार्वजनिक गर्नेछ ।
म्याक्डोनाल्ड सन् २०१८ को जनवरीमा हल सिटीमा अनुबन्ध भएका थिए । इन्ज्यूरीका कारण उनले गत सिजन केवल ३ खेल मात्र खेलेका थिए । नसाको समस्याबाट उनी हालै मात्र सञ्चो भएका हुन् ।
