यहि सरकारलाई बलियो बनाउनुको विकल्प छैन : प्रचण्ड
काठमाडौं, २३ भदौं । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले नेकपालाई सबैले स्वीकार गर्ने पार्टीका रूपमा अगाडि बढाउनु पर्नेमा जोड दिएका छन् ।
पार्टीको केन्द्रीय कार्यालयद्वारा आज पार्टी कार्यालयमा आयोजित शहीद सुरेश वाग्ले ‘वासु’ को २१ औं स्मृतिसभामा पूर्व प्रधानमन्त्री तथा अध्यक्ष ‘प्रचण्ड’ ले पछिल्लो समयमा पार्टीका नेताहरु अलि बढी आत्म केन्द्रित र व्यक्ति केन्द्रित हुँदै गएको भन्दै सबैलाई स्वीकार हुने गरी जनताको सेवामा समर्पित पार्टी बनउनेतर्फ केन्द्रित हुन कार्यकर्तालाई निर्देशन दिए ।
‘हामीले कम्युनिष्ट आन्दोलनलाई लोकप्रिय बनाएका छौं, लोकप्रिय मत पाएका छौं, बहुमतको सरकार छ, तर वैचारिक र नैतिक चरित्रका दृष्टिले खस्किएका छौं, जनताको आवश्यकता भन्दा पनि हाम्रो आवश्यकतालाई महत्व दिएका छौ’, उनले भने ।
अध्यक्ष ‘प्रचण्ड’ ले पार्टीलाई जनतामा समर्पित गर्न सकेको खण्डमा मात्र शहीदकोे वास्तविक सपनामा पूरा हुने बताए । ‘कमरेड वासु वैचारिक, बलिदान, बौद्धिक र निष्ठा र चरित्रको हिसाबले अत्यन्त उच्च तहमा हुनुहुन्थ्यो, उहाँबाट हामीले पनि सिक्नु पर्ने हुन्छ’, उनले भने ।
पूर्व प्रधानमन्त्री तथा पार्टीका वरिष्ठ नेता झलनाथ खनालले पार्टी एकता प्रक्रिया जतिसक्दो चाँडो सक्ने तयारी भइरहेको बताउँदै शहीदको सपना पूरा गर्न नयाँ सङ्कल्पसहित अगाडि बढ्ने बताए ।
उनले भने, ‘हामीले पार्टीलाई जति गतिशील बनाउन सक्छौं त्यति नै शहीद सुरेश वाग्लेको सपना पूरा गर्न सक्छौं ।’ उनले अहिलेकै सरकारलाई बलियो बनाएर अघि बढ्नुको कुनै विकल्प नभएको समेत बताएका छन् ।
पार्टीका प्रचार विभाग प्रमुख तथा प्रवक्ता नारायणकाजी श्रेष्ठले पार्टी एकताको सम्पूर्ण काम टुङ्गो लागेपछि पार्टीले जनताको आवश्यकतानुसार काम गर्ने प्रतिबद्धता व्यक्त गरे ।
