मीरा राईलाई अमेरिकी विश्वविद्यालयद्वारा मानार्थ पिएचडी उपाधि

काठमाडौं, २४ भदौ । चर्चित अष्ट्रा ट्रेल रनर मीरा राईलाई अमेरिकाको एक युनिभर्सिटीले मानार्थ विद्यावारिधीको उपाधि प्रदान गरेको छ । अमेरिकास्थित विश्वप्रसिद्ध वेस्टक्लिफ युनिभर्सिटीले राईको साहसिक कार्यको सम्मान गर्दै मनार्थ उपाधि दिएको हो ।


प्रेसिडेन्सियल बिजनेश स्कुलद्वारा आयोजित दीक्षान्त समारोहमा राईलाई आइतबार याक एण्ड यति होटलमा उपराष्ट्रपति नन्दबहादुर पुन र युनिभर्सिटीका प्रा.डा. डेभिड मेकेनीले संयुक्त रुपमा विद्यावारिधी उपाधि प्रदान गरेका हुन् । प्रेसिडेन्सियल बिजनेश स्कुल वेस्टक्लिफको सम्बन्धनप्राप्त नेपालस्थित बिजनेश कलेज हो ।


मीराले आफूले सपनामा पनि नसोचेको उपलब्धि हासिल गरेको बताइन् । ‘यो उपाधि पाउँला भनेर सपनामा पनि सोचेकी थिइन्, यसले मलाई औधी खुशी बनाएको छ,’ उनले भनिन्, ‘म यो उपाधिका लागि वेस्टक्लिफ युनिभर्सिटी र प्रेसिडेन्सियल बिजनेश स्कुललाई विशेष धन्यवाद दिन चाहन्छु ।’


उनले यो उपाधिबाट आफूजस्तै परिश्रम गरेर अष्ट्रा ट्रेलमा दौडने नवप्रतिभाहरुलाई पनि थप मेहनेत गर्न प्रेरणा मिल्ने आशा ब्यक्त गरिन् । सो अवसरमा राईले आफूले कक्षा ७ मा पढाइ छोडेर जनयुद्धमा होमिएको र त्यसपछि पुनः फर्केर खेलसँगै उच्च शिक्षाको भोकले पढाइमा लागेको कुरा पनि स्मरण गरिन् । उनले जीवनमा आइपर्ने संघर्षदेखि हार नमानेर अगाडि बढ्दा महत्वपूर्ण उपलब्धि हासिल हुने बताइन् ।


भोजपुरममा जन्मिएकी राई अन्तर्राष्ट्रिय अल्ट्रा धावकको रुपमा चर्चित छिन् । उनले विभिन्न अन्तर्राष्ट्रिय प्रतियोगितामा नेपाली झण्डा फहराइसकेकी छन् ।


सो अवसरमा उपराष्ट्रपति पुन र प्राडा मेकेनीले वेस्टक्लिफ युनिभर्सिटीबाट स्नातक र स्नातकोत्तर तह उत्तीर्ण गरेका प्रेसिडेन्सियल विजनेश स्कुलका ९५ छात्रछात्रा दीक्षित गरेका थिए।


युनिभर्सिटीका प्राडा मेकेनीले बजारको आवश्यकता र मागअनुसार विश्वविद्यालयले पठनपाठन गरिरहेको चर्चा गर्दै नेपाली छात्रछात्राको अध्ययन उत्कृष्ट रहेको दाबी गरे । स्कुलकी शैक्षिक कार्यक्रम निर्देशक कल्पना गुरुङले प्रेसिडेन्सियल बिजनेश स्कुलमा सैद्धान्तिक तथा व्यवहारिक अध्ययन हुने बताइन् ।

प्रतिक्रिया दिनुहोस्