‘तक्मे बुढा’ले सहपाठी नै गरे विवाह, ६ महिनापछि श्रीमती सार्वजनिक
काठमाडौं, २७ भदौ । ‘तक्मे बुढा’को उपनामले लोकप्रिय कलाकार विल्सन विक्रम राईले श्रीमती सार्वजनिक गरेका छन् । उनले विवाह गरेको ६ महिनापछि मात्र श्रीमती सार्वजनिक गरेका हुन् ।
गत फागुनमै विवाह गरे पनि विल्सनले भदौको तेस्रो सातामा आएर आफ्नो विवाह भएको औपचारिक घोषणा गरेको समाचार आजको कान्तिपुर साप्ताहिकले छापेको छ ।
राईले स्कुलदेखिका सहपाठी झापाकी सरिना लामासँग परंपरागत विवाह गरेका हुन् । झापामा सरिनाले भुटानी शरणार्थीसम्बन्धी संयुक्त राष्ट्र संघको एउटा प्रोजेक्टमा काम गरेकी छन् ।
विवाह गरेको कुरा लुकाउनु पर्ने कारणसमेत उनले स्पष्ट पारेका छन् । उनका अनुसार आफ्नो विवाहको कुरा लुकाउन चाहेका थिएनन तर दुलही पक्षले विभिन्न कारणले विवाहको कुरा सार्वजनिक गर्न नचाहेपछि उनीहरुले विवाहलाई लुकाएजस्तै भएको हो ।
