आपत्तिजनक भिडियो बनाएर पाँच महिलाले उठाए १५ करोड, फन्दामा नेतादेखि कर्मचारीसम्म
काठमाडौं, ४ असोज । केहि महिनाअघि मात्र झापामा एक महिलाले नक्कली प्रेम गरेको वहानामा एक व्यापारीसँग फिरौती असुल्न खोज्दा पक्राउ परिन् ।
नक्कली माया प्रेमको नाटक रच्दै अप्ठ्यारोमा पारेर रकम असुल्ने घटना नेपालमा मात्र होइन छिमेकी देश भारतमा पनि हुने गर्छ । भारतको मध्य प्रदेशमा यस्तै हनि ट्रयापिङ’ मा पार्ने महिलाको कर्तुत बाहिर आएको छ ।
भारतको मध्यप्रदेशका कयैन नेता र सरकारी अधिकृतलाई व्ल्याकमेल गरेर करोडौं उठाउने पाँच महिला पक्राउ परेका छन् । अनुसन्धानका क्रममा उनीहरुबाट अनौठा सूचनाहरु प्राप्त भएको छ ।
तिनलाई पक्रनको लागि प्रहरी र आतकंवाद विरोधी स्क्वाड (एटीएस) को प्रयोग भएको थियो । अनुसन्धानका क्रमले ती पाँच महिलाले झण्डै २० जनालाई आफ्नो जालमा फसाएर तिनको आपत्तिजनक भिडियो बनाएको र ती भिडियो इन्टरनेटमा हालिदिने धम्की दिएर तीबाट १५ करोड भारु उठाएको खुलासा भएको भारतीय सञ्चार माध्यमले जनाएका छन् ।
तिनले आफूले शिकार बनाएका धनाढ्यबाट ५० लाखदेखि तीन करोड भारुसम्म उठाएको पाइएको छ । पक्राउ परेका महिलाका मोबाइल जाँचमा करिब ९० आपत्तिजनक भिडियो पनि प्राप्त भएको छ । यसमध्य ३० भिडियोमा आईएएस, आईपीएस अधिकारी र नेताहरुका छन् । प्रहरीले तिनलाई पक्राउ नगरेको भए पनि फोरेन्सीक जाँच सिफारिस गरेको छ ।
यस प्रकरणमा थप ५–६ युवती सामेल रहेको विश्वास गरिएको भए पनि यसका मुख्य व्यक्ति श्वेता जैन विजय र श्वेता जैन स्वम्निल मानिएका छन् । ती दुईसँगै बरखा अमित सोनीलाई एक निगम इन्जिनियरबाट ३ करोड मागेको आरोपमा जेल पठाएको छ ।
अन्य आरोपीहरु आरती दयाल, छात्रा मोनिका यादव र ड्राइभर ओम प्रकाशलाई सेप्टेम्बर २२ सम्म इन्दौर प्रहरीको हिरासतमा राख्ने अनुमती दिएको छ । यी महिलाको फन्दामा पर्ने धेरैजसो अधिकारीहरु राज्यका इन्दौर र भोपाल क्षेत्रका छन् । ती महिला त्यस क्षेत्रको क्लबमा आउने जाने गर्ने र त्यहीं आउजाउ गर्ने सरकारी अधिकारीलाई फसाउने गरेको खुलेको छ ।
प्रदेशका शीर्ष आईएएस अधिकारी र इन्दौर नगर निगमका इञ्जिनियरसँग भएको हनि ट्रयापलाई प्रहरीले एक संगठित अपराध मानेको छ ।
सरकार र प्रशासनका शीर्ष अधिकारी संलग्न भएका कारण भारतको आतंकवाद विरोधी एजेन्सीले नै यसको अनुसन्धान थालेको थियो । देशका गोप्य सूचना थुत्न आतंकवादीहरु पनि यस्तो कार्यमा प्रयोग हुन सक्ने आशंकामा १५ सदस्यीय एटीएस परिचालन भएको थियो ।
हनि ट्रयापमा संलग्न महिलाहरु लेट नाइट पार्टीका सौखिन छन् । तिनका मोबाइल फोनमा त्यस्तो पार्टीका धेरै भिडियो भेटिएको जनाइएको छ ।
धेरैजसो पार्टी भोपाल–इन्दौर चार लेन सडकको दायाँ वायाँ रहेका रिसोर्ट, होटल वा फार्म हाउसमा हुन्थ्यो । तिनमा आईएएस–आईपीएस अधिकारलाई पनि बोलाइन्थ्यो । एजेन्सी
