यौन दूराचारको आरोपपछि राजीनामा दिंदै सभामुख
काठमाडौं, १४ असोज । संसद सचिवालयकी महिलालाई यौन दुर्व्यवहारको संगीन आरोपमा मुछिएपछि सभामुख कृष्णबहादुर महराले राजीनामा दिने भएका छन् ।
मंगलबार बिहान बसेको नेकपा शीर्ष नेताहरुको बैठकले पार्टीको तर्फबाट सभामुख भएका महरालाई पदबाट राजीनामा गर्न निर्देशन दिएका हुन् । मंगलबार बिहान प्रधानमन्त्री निवास बालुवाटारमा बैठक बसेको थियो । बैठकमा अध्यक्ष तथा प्रधानमन्त्री केपी शर्मा ओली, अर्का अध्यक्ष पुष्पकमल दाहाल प्रचण्ड, महासचिव विष्णु पौडेल, सुवाष नेम्वाङसहित सहभागी थिए ।
‘बैठकमा छलफलको मुख्य विषय सभामुख ज्यूमाथि लागेको यौन दूराचार रहेको थियो’, नेकपा एक नेताले भने, ‘बैठकले उहाँलाई राजीनामा गराउन निर्देशन दिने निर्णय गरेको छ । सचिवालयको बैठकले यसलाई औपचारिकता दिनेछ ।’
सभामुख महरा यौन दूराचारको संगीन आरोपमा तानिएपछि प्रमुख प्रतिपक्षी दल नेपाली कांग्रेस, साझा पार्टीलगायतले सभामुखले नैतिकताको आधारमा राजीनामा दिनुपर्ने माग गरेका छन् ।
