सभामुख महराको राजीनामा स्वीकृत, वेवसाइटबाट हटाइयो नाम र तस्विर
काठमाडौं, १५ असोज । निवर्तमान सभामुख कृष्णबहादुर महराको राजीनामा स्वीकृत भएको छ ।
बुधबार संघीय संसद सचिवालयले सभामुख महराले उपसभामुख शिवमाया तुम्बाहाम्फेलाई राजीनामा दिएको सूचना प्रकाशन गरेको छ ।
साथै संघीय संसदको बेव साइटबाट उनको फोटो र नाम हटाइएको छ । उनको परिचय रहेको पहिलेको स्थानमा विना फोटो सभामुख मात्र लेखिएको छ ।
संसद सचिवालयकी कर्मचारी रोशनी शाहीले महराले आइतबार बेलुका आफ्नो कोठमा आई महराले बलात्कार गरेको आरोप लगाएपछि उनको पद गुमेको हो ।
मंगलबार बिहान बसेको नेकपा सचिवालय बैठकले महरालाई राजीनामा दिन सुझाव दिएपछि उनले छानविन नसकिञ्जेलका लागि भन्दै आफ्नो पदबाट राजीनामा दिएका थिए । आज मात्रै महराले विज्ञप्तीको भाषा सञ्याउँदै राजीनामा पत्र उपसभामुख शिवमाया तुम्वाहाम्फेलाई बुझाएका छन् ।
नेपालको संविधानको धारा ९१ मा सभामुखले राजीनामा दिएका स्वतः स्वीकृत भएको मानिने व्यवस्था छ । उनलाई संगीन आरोप लगाएकी शाहीले मंगलबार बेलुका भने आफ्नो बोली फेरेर महराले आफूलाई केही नगरेको दावी गरेकी छिन् ।
