बलिउड गायक टोनी कक्कर नेपाल आउँदै
काठमाडौं, २७ असोज । बलिउड गायक टोनी कक्कर नेपाल आउने भएका छन् । उनी अक्टोबर २५ मा क्लब फरेनहाइटमा आयोजना हुने एक कार्यक्रमका लागि नेपाल आउन लागेका हुन् । क्लबले यसअघि गायक आदित्य नारायण झालाई प्रस्तुत गरेको थियो ।
टोनीले आफ्नो चर्चित गीत संगीतमार्फत दर्शकलाई झुमाउने छन् । उनी गत सेप्टेम्बर मै आउने तय थियो । तर अन्तिम समयमा प्राविधिक समस्याले गर्दा आउन पाएनन् । उनले आफ्नो नेपाल यात्राको बारेमा सामाजिक सञ्जालमा पनि उल्लेख गरेका छन् ।
‘कोका कोला तु, धिमे धिमे, मिले तो हम, ओ हमसफर’ लगायतका गीत गाएर दर्शकको मन जितेका टोनीलाई सी एन आई इभेन्ट्सको आयोजनामा नेपाल ल्याउन लागिएको हो । टोनी आफैमा राम्रो कम्पोजर र लिरिसिस्ट पनि हुन् ।
उनले फिल्ममा गीतमा कम्पोज गर्नु र स्वर दिनुका साथै आफ्नै सिंगल ट्रयाकहरु पनि सार्वजनिक गरेका छन्, जसलाई दर्शक तथा श्रोताले रुचाएका छन् । पछिल्ला वर्षहरुमा भारतका चर्चित गायक–गायिकादेखि नायक–नायिका नेपाल आउने क्रम बढेको छ । कार्यक्रम बेलुकी ८ बजेबाट शुरु हुने जनाइएको छ । जसमा प्रवेशको लागि टिकटको व्यवस्था पनि छ ।
