महराको डीएनए परीक्षण गरिने, म्याद थपका लागि अदालत पेस गरिंदै
काठमाडौं, २८ असोज । बलात्कारको आरोप लागेका निवर्तमान सभामुख कृष्णबहादुर महराको डीएनए परीक्षण गरिने भएको छ ।
संसदकी महिला कर्मचारी रोशनी शाहीले महराले आफूमाथि बलात्कार गरेको आरोप लगाउँदै प्रहरीमा जाहेरी दिएपछि दशैंअघि नै पक्राउ परेका महरा प्रहरी नियन्त्रणमा छन् । महानगरीय प्रहरी वृत्त सिंहदरबारको हिरासतमा राखिएका महराको स्वास्थ्यमा समस्या आएपछि अहिले नर्भिक अस्तपालको क्याबिनमा छन् । उच्च रक्तचापको समस्या देखिएपछि उनलाई अस्पताल भर्ना गरिएको थियो । प्रहरीले मंगलबार उनलाई म्याद थपका लागि अदालतमा लैजाँदैछ ।
डीएनए परीक्षण गरिंदै
घटनाको अनुसन्धानमा खटिएको काठमाडौं प्रहरी परिसर टेकु र महानगरीय प्रहरी वृत्त, बानेश्वरले शाहीको आरोपको पुष्ट्याइका लागि महराको डीएनए परीक्षण गर्ने भएको छ ।
अपराधस्थल भनिएको घरबाट बरामद भएको फुटेको चस्मा, जुत्ताको जिब्रीलगायतका सामग्री महराको हो–होइन भन्ने प्रमाणित गर्न डीएनए जाँच गर्न लागिएको स्रोतले जानकारी दिएको छ । प्रहरीले महराको निवासबाट पनि केही जुत्ता र अन्य सामग्री पनि बरामद गरिसकेको स्रोतले जानकारी दिएको छ ।
संसद सचिवालयमै कार्यरत पीडित महिलाले १३ असोजमा घटना सार्वजनिक गर्दै दिएको भिडियो अन्तरवार्तामा ती सबुत देखाइएको थियो । आफू सभामुखबाट बलात्कृत भएको बताउँदै प्रहरी कन्ट्रोल १०० मा फोन गरेको भोलिपल्ट भिडियो सार्वजनिक भएपछि मात्रै प्रहरीले ती सबुत संकलन गरेको थियो ।
अनुसन्धानमा संलग्न एक अधिकृतले भन्छन्, ‘चस्मा वा जुत्ताको जिब्रीमा अभियुक्तको पसिना हुन सक्ने भएकाले डीएनए परीक्षण गरेर दाँज्न खोजिएको हो ।’ अधिकृतहरुका अनुसार जबरजस्ती करणी उद्योगको कसुर पुष्टि हुन दुई वटा विषय सबैभन्दा महत्वपूर्ण हुन्छ । पहिलो, अभियुक्त घटनास्थलमा पुगेको देखिनुपर्छ ।
यो विषय प्रहरीले सीसी टीभी फुटेजको विश्लेषणबाट पुष्टि गरिसकेको छ । अनुसन्धान अधिकृतहरुका अनुसार महराको गाडी १२ असोजमा साँझ ७ बजेतिर महिलाको घर छेऊ रोकिएको देखिन्छ । यद्यपि, सीसी टीभी फुटेज स्पष्ट भने छैन ।
त्यहाँबाट पानै ९ बजे महरा सवार गाडी फर्किएको देखिन्छ । त्यसबीचको दुई घण्टाको अवधिमा महिला र महरा मात्रै कोठाभित्र रहेको प्रहरीको भनाइ छ । प्रहरीमा खबर भएपछि गएको बानेश्वर वृत्तको टोलीले घरको माथिल्लो तलामा रहेको वृद्ध महिलालाई पनि भेटेको थियो । तर, ढिला पुगेका कारण महरा निस्किसकेको बताइएको छ ।
महरासँगै गएका अङ्गरक्षकले पनि उनी घटनास्थलमा पुगेको अनौपचारिक बयान दिइसकेका छन् । सरकारी वकिलसामु औपचारिक बयान हुनेछ ।
महरामाथि लागेको अभियोग पुष्टि गर्न अनुसन्धान अधिकृतसामु अर्को जिम्मेवारी शारीरिक आक्रमण खुल्ने सबुत संकलन गर्नु पनि हो । अधिकांश बलात्कार प्रयासका घटनामा पीडितको कपडा च्यातिएको देखिन्छ । तर, यो घटनामा त्यस्तो छैन ।
बरु दुवै पक्षलाई चोट लागेको देखिएको अनुसन्धान अधिकृत बताउँछन् । प्रहरीले अस्पतालमा गराएको स्वास्थ्य परीक्षणले पनि पीडितको शरीरमा चोटपटक भएको देखाइसकेको छ ।
‘यस्तो अवस्थामा कि त अन्य व्यक्ति पनि भित्र प्रवेश गरेको खुल्नु पर्छ । नभए महराकै कारण चोटपटक लागेको पुष्टि हुन्छ’, अनुसन्धानमा संलग्न अधिकृत भन्छन् । शाहीको शरीरमा लागेको चोटको फरेन्सिक जाँचमा पनि चोट लाग्नुमा बाहिरका कोही व्यक्तिको संलग्नता हुनसक्ने जनाइएको
मंगलबार अदालतमा म्याद थपिंदै
महरा १९ गते असोजमा सरकारी निवासबाटै परेका थिए । महिलाको आरोप सार्वजनिक भएलगत्तै सभामुख पदबाट राजीनामा दिन सत्तारुढ नेपाल कम्युनिष्ट पार्टी (नेकपा) को सचिवालय बैठकले सुझाएको थियो ।
महराको राजीनामासँगै पीडित महिलाको अर्को भिडियो सार्वजनिक भएको थियो, जसमा उनले बोली फेर्दै महरा आफ्नो कोठामा आउँदै नआएको दाबी गरिन् ।
उजुरीका दिनका लागि उनी प्रहरी कहाँ त पुगिनन् नै, स्वास्थ्य परीक्षणका लागि पनि तयार भएकी थिइनन् । बरु १५ असोजमा बानेश्वर प्रहरीमा गएर ‘आफू डिप्रेसनको शिकार भएको र के बोलें थाहा नभएको, महरा आफ्नो बाबु सरह भएको’ भन्दै निवेदन दिइन् ।
पीडित महिला र उनका पतिबीच सम्बन्ध विच्छेद गर्ने निर्णय भएको १६ असोजमा सार्वजनिक भयो । तर, घटनाले त्यसबेला फेरि अर्को बदलाव आयो, जब पीडित महिलाले प्रहरीको काउन्सिलिङपछि महराविरुद्ध किटानी जाहरी दिइन् ।
त्यसबेला अदालत दशैं विदाका कारण बन्द भएकाले उनको म्याद थप हुन पाएको थिएन । सोमबारबाट अदालतको नियमित काम सुचालु भएसँगै उनलाई मंगलबार म्याद थप्ने तयारी प्रहरीको छ ।
काठमाडौं प्रहरी परिसर, टेकुका प्रमुख एसएसपी उत्तमराज सुवेदी भन्छन्, ‘विदा भएको दिनको समेत जोडेर एकमुष्ठ म्याद थप हुन्छ होला ।’ उनका अनुसार त्यसअघि सरकारी वकिलको रोहवरमा बयान लिने कार्य शुरु हुनेछ ।
अनुसन्धान अधिकृतका अनुसार यस प्रकृतिको मुद्दा बढीमा २५ दिनभित्र पेश गरिसक्नुपर्छ । तर, सरकारी वकिलले पनि अध्ययन गर्नुपर्ने भएकाले चाँडै पेश गर्ने तयारी प्रहरीको छ ।
