देउवाको स्पष्टिकरण : आलमको मुद्दामा अनुसन्धान गर्न कांग्रेसले सघाउने
काठमाडौँ,२ कात्तिक । सांसद मोहम्मद आफताब आलमको बचाउमा उत्रिएका कांग्रेस सभापति शेरबहादुर देउवा आफ्नो अभिव्यक्तिबाट पछि हटेका छन् ।
सभापति देउवाले पार्टीबाट रौतहट ९२ मा विजयी सांसद मोहम्मद अफताब आलममाथिको मुद्दामा कुनै पनि पूर्वाग्रह र दबाबमुक्त रहेर अनुसन्धानमा सघाउने बताएका छन्।
भक्तपुरको बोडेमा शुक्रबार भएको पार्टीको कार्यक्रममा सभापति देउवाले १२ वर्ष पूरानो घटनामा आलमलाई पक्राउ गरी सरकारले कांग्रेसविरूद्ध षड्यन्त्र गरेको बताएपछि उनको आलोचना भएको थियो।
शनिबार विज्ञप्ति निकालेर देउवाले दिएको प्रष्टिकरणमा भनिएको छ, ‘कुनै पनि गम्भीर मुद्दामा प्रक्रियागत ढिलासुस्ती हुँदा त्यसले निर्दोष सावित हुने या दोषी ठहर हुने सत्यतथ्य अन्वेषण गर्ने कार्यमा बाधा पुग्छ नै। १२ वर्ष पूरानो मुद्दामा मैले यही संकेत गरेको हुँ।’
उनले आफ्ना धारणाले उत्पन्न गरेको अन्यौल र अष्प्रष्टता चिर्न विज्ञप्ति निकालेको उल्लेख गर्दै थपेका छन्, ‘कानुनी राज्यमा विश्वास गर्ने नेपाली कांग्रेस कोहीमाथि पनि जरूरी अनुसन्धानको विपक्षमा उभिन सक्दैन।’
कानूनी राज्यमा विश्वास गर्ने पार्टीले जरुरी अनुसन्धानको विपक्षीमा उभिन नसक्ने देउवाले प्रष्ट पारेका छन। ‘महोम्मद आफताव आलममाथिको मुद्दामा कुनैपनि पूर्वाग्रह र दबावमुक्त रहेर अनुसन्धान गर्ने कार्यलाई कांग्रेसको सहयोग हुन्छ’ देउवाले भनेका छन,‘निर्दोष कोही दण्डित नहुने र दोषीलाई उन्मुक्ति हुन नहुने हाम्रो प्रष्ट मान्यता म सार्वजनिक रुपले प्रष्ट्याउन चाहन्छु
आलमविरूद्ध २०६४ सालमा बम बनाउँदै गर्दा पड्केर घाइते भएका मानिसलाई ज्युँदै इँटाभट्टामा पोलेर मारेको आरोपमा प्रहरीले पक्राउ गरेर अनुसन्धान गरिराखेको छ।
इँटाभट्टामा ज्यूँदै मान्छे जलाउने आलामको यस्तोसम्म थियो आतंक
