तिहारको मुखमा घट्यो सुनको भाउ
काठमाडौं, ५ कार्तिक । नेपाली चाड तिहार घर–आँगनमा भित्रिंदैछ । तिहारमा सुनका गहना लगाउन धेरै महिलाले रहर गर्ने गर्छन् ।
सुन महँगो भएर गहना जोड्न नसकिरहेका बेला तिहारको छेकमा सुनको भाउ केहि सस्तो भएको छ । मंगलबार नेपाली बजारमा सुनको मूल्यमा सामान्य गिरावट आएको छ ।
नेपाल सुनचाँदी व्यवसायी महासंघका अनुसार मंगलबार छापावाल सुनको मूल्य रु २०० ले घटेर ७० हजार २०० मा कारोबार भएको छ । सोमबार सुनको मूल्य तोलामा ७० हजार ४०० मा कारोबार भएको थियो ।
यस्तै तेजावी सुनको मूल्य ६९ हजार ९०० मा कारोबार भएको छ । यस्तै चाँदी तोलामा रु ८५० मा कारोबार भएको छ । सोमबार पनि चाँदी यही मूल्यमा कारोबार भएको थियो ।