बंगलादेशी राष्ट्रपतिको भक्तपुरकाे ऐतिहासिक स्थलको भ्रमण (फोटोफिचर)
काठमाडौं, २६ कार्तिक । राष्ट्रपति विद्या देवी भण्डारीको मैत्रीपूर्ण निमन्त्रणामा नेपाल भ्रमणमा आउनुभएका बंगलादेशका राष्ट्रपति मोहमद अब्दुल हमिद मंगलबार भक्तपुरका ऐताहासिक स्थलको भ्रमण गरेका छन् ।
चार दिने भ्रमणका लागि मंगलबार नै नेपाल आइपुगेका राष्ट्रपति हमिदले अपरान्ह ४ बजे विश्व सम्पदा सूचीमा रहेको भक्तपुरको दरबार स्वाक्वर र टौमढीस्थित पाँचतले मन्दिरको अवलोकन गरेको हो । उनको स्वागत भक्तपुर नगरपालिकाका प्रमुख सुनिल प्रजापतिले गरेको हो । राष्ट्रपति हमिदको स्वागतका लागि माक प्वाखँ अर्थात बाँदर नाच समेत देखाइएको थियो ।
अपरान्ह ४ बजेर ८ मिनेटमा भक्तपुर पुगेका राष्ट्रपति हमिदले झण्डै १ घण्टा बिताएका थिए ।भक्तपुरको न्यातपोल मन्दिर अवलोकनपश्चात उनले तौमडीमा साँस्कृतिक कार्यक्रमअन्तर्गत देवी नाचसमेत हेरे ।
ऐताहासिक स्थलको भ्रमण गरेका राष्ट्रपति हमिदले पुरातात्विक वस्तुहरुको चासोपूर्वक अवलोकन तथा निरीक्षण गरेका थिए । उनी काठमाडौंबाट सेनाको हेलिकोप्टरमार्फत भक्तपुर आएको हो ।
सैनिक स्कुलमा हेलिकप्टर ल्याण्डिङ गरेर उनी भक्तपुरतर्फ प्रस्थान गरेका थिए। ५२ सदस्यीय प्रतिनिधि मण्डलको साथमा उनी आज नेपाल भ्रमणमा आएका हुन्।
