कर्मचारी कुट्ने प्रहरी हवल्दारलाई उन्मुक्ति
चितवन, २९ कार्तिक । भरतपुर अस्पतालको पोस्टमार्टम कक्षमा कार्यरत दुई कर्मचारीलाई निर्धात कुटपिट गर्ने प्रहरी हवल्दारलाई सामान्य स्पष्टीकरण सोधेर उन्मुक्ति दिइएको छ ।
भरतपुर अस्पतालमै खटिएका प्रहरी हवल्दार जमिर अली सेखले गत ७ कात्तिकमा ४९ वर्षीय देवानन्द राई र ६० वर्षीय पूर्ण विकलाई निर्धात कुटपिट गरेका थिए ।
हवल्दार सेखको कुटाइबाट विकको देब्रे हात भाँचिएको थियो भने राईको ढाडभरि निलडाम थिए । तर, जिल्ला प्रहरी कार्यालयले सामान्य स्पष्टीकरण लिएर हवल्दार सेखलाई उन्मुक्ति दिएको अस्पतालका कर्मचारीहरूले गुनासो गरेका छन् ।
जिल्ला प्रहरी कार्यालयका प्रवक्ता डिएसपी एकनारायण कोइरालाले हवल्दार सेखसँग दुईपटकसम्म स्पष्टीकरण लिएर कारबाही गरिएको बताए । तर, कारबाही गरिएको भनिएका हवल्दार अझै भरतपुर अस्पतालमै खटिएका छन् ।
‘घटनापछि त्यहाँबाट हटाएर अनुसन्धान गर्नुपर्ने थियो,’ अस्पतालका एक कर्मचारीले भने, ‘प्रहरीबाटै दण्डहीनताको संरक्षण भएको छ ।’ ६५ वर्षीया एक महिलाको पोस्टमार्टम गर्ने क्रममा कानमा लगाएको गहना चोरी गरेको आरोपमा आफूहरूमाथि लाठीले हानिएको घाइतेहरूको भनाइ छ ।
घटनापछि घाइते राईले अस्पताल प्रशासनमा पनि निवेदन दिएका थिए । अस्पतालले शाखा अधिकृत कृष्णप्रसाद गौतम र रामहरि ढकालको संयोजकत्वमा अनुसन्धान टोली बनाएको थियो । टोलीले प्रतिवेदन बुझाइसकेको छ । तर, अस्पताल प्रशासनले प्रतिवेदन सार्वजनिक गरेको छैन । नयाँ पत्रिकाबाट
