टी–१० लिगमा सन्दीपको टिम कर्नाटका पराजित
काठमाडौं, २ मंसिर । युएईमा जारी टि–१० क्रिकेट लिगमा नेपाली लेग स्पिनर सन्दीप लामिछाने सम्मिलित कर्नाटका टुसकेर्सले पराजित भएको छ । सोमबार भएको खेलमा कर्नाटका डेकन ग्लाडीयटर्ससँग पाँच विकेटले पराजित भएको हो ।
कर्नाटकाले दिएको १११ रनको लक्ष्य ग्लाडीयटर्सले ८ ओभर ३ बलमा पाँच विकेट गुमाउँदै १११ बनायो । ग्लाडीयटर्सका लागि किरोन पोलार्डले सर्वाधिक ४५ रनको योगदान गरे ।
त्यस्तै भानुस्का राजपाकसले २७ रन जोड्दा मोहमद साजादले १३ बनाउँदा डेनियस लोरेन्सले ११ रन जोडे ।
यसअघि आबु धाबीमा टस हारेर पहिले ब्याटिङ गरेको कर्नाटकाले निर्धारित १० ओभरमा ३ विकेट गुमाएर ११० रन बनायो । कर्नाटकाका लागि जोन्सन चार्ल्सले ३५ रन, कप्तान हसिम अल्मलाले अविजित ३२ रन , एभिन लुइसले २३ रन र रोस व्हाइट्लीले १३ रन बनाए ।
बलिङतर्फ ग्लाडीयटर्सका जाहिर खान, फवाद अहमेद र मिगेल प्रेटोरिएसले समान एक(एक विकेट लिए ।