धरानमा तिलक राईको अग्रता बढ्दो, यस्तो छ पछिल्लो मत परिणाम
काठमाडौं, १६ मंसिर । धरान उपमहानगरपालिकाको मतगणना जारी रहेको छ । प्रतिष्ठाको लडाइका रुपमा हेरिएको धरान उपमहानगरको उपचुनावमा पछिल्लाे मत परिणाम अनुसार नेपाली कांग्रेसले अग्रता बढाउँदै लगेकाे छ ।
कांग्रेस उम्मेदवार तिलक राईले २५ हजार ९ सय ९८ मत हासिल गरेका छन् । नेकपाका उम्मेदवार प्रकाश राई २३ हजार ३ सय ९३ मतका साथ कांग्रेस उम्मेदवारलाई पछ्याइरहेका छन् ।उपमहानगरपालिकाको वडा नंं. १ र ७ को अहिले मतगणना भइरहेको छ ।
यसअघि तिलकले २१ हजार ३११ मत प्राप्त गर्दा नेकपाका उम्मेद्वार प्रकाश राईले २० हजार ८ मत ल्याएका छन् ।
धरान उपमहानगरपालिकाकै वडा नं. ७ को वडाध्यक्षका लागि पनि शनिबार मतदान भएको छ । यहाँ अहिले मतगणना भइरहेको छ ।
अहिलेसम्मको मत परिणाम अनुसार धरानमा पनि सत्तारुढ नेकपालाई धक्का पुग्ने खतरा देखिएको छ ।
०७४ को स्थानीय निर्वाचनमा तारा सुब्बा तत्कालीन एमालेको तर्फबाट मेयरमा निर्वाचित भएका थिए । उनको निधन भएपछि रिक्त मेयर पदका लागि शनिबार त्यहाँ उपनिर्वाचन भएको हो ।