लक्ष्मण तामाङले जिते कराँतेको पुरुष कुमुतेमा स्वर्ण
काठमाडौं, १६ मंसिर । १३औं दक्षिण एसियाली खेलकुद (साग) अन्तर्गत कराते पुरुष कुमुतेमा लक्ष्मण तामाङले नेपालको लागि पहिलो स्वर्ण जितेका छन् ।
सातोबादोको स्थित करातेहलमा भइरहेको खेलमा सोमबार कातातर्फ स्वर्ण जितेको नेपालले फाइट (कुमुते)तर्फ पनि स्वर्ण जितेको हो ।
उनले ५५ केजी तौल समूहमा स्र्वण जितेको हो । उनले बंगलादेशका मोहम्मद मस्तोफालाई १–० ले पराजित गरे । सेमिफाइनलमा उनले श्रीलंकाका वार्नाकुला सूर्यलाई पराजित गरेका थिए ।
नेपालले करातेमा महिला, पुरुष समुह कातामा पनि स्वर्ण जितेको छ । भने मण्डेकाजी श्रेष्ठ पुरुष एकल काता तर्फ स्वर्ण र महिला एकल कातामा चञ्चला दनुवारले रजत जितेकी छिन् ।
लक्ष्मणले स्वर्ण जितेसँगै नेपालले सागमा जितेको स्वर्णको संख्या ७ पुगेको छ ।