साग : विकास थापा र सञ्जु चौधरीले जिते भारत्तोलनमा स्वर्ण
भारत्तोलनमा नेपालले जित्यो १६ पदक
काठमाडौं, २२ मंसिर । नेपालमा जारी १३ औं साग अन्तर्गत भारोत्तोलन विकास थापा र सञ्जु चौधरीले नेपालका लागि स्वर्ण पदक जितेका छन् ।
नेपालले भारोत्तोलनमा दुई स्वर्ण, तीन रजत र ११ काँस्य गरी १६ पदक जितेको छ ।
योसँगै भारत्तोलनका सबै खेल सकिएका छन् । २० स्वर्णसहित कुल ६० पदकका लागि महिला तथा पुरुषतर्फ १०–१० तौल समूहमा भएको खेलमा नेपालले १६ स्पर्धामा भाग लिएको थियो ।
विकास थापाले ८९ किलो तौल समूहमा र सञ्जु चौधरीले महिला ५९ किलो तौल समूहमा स्वर्ण पदक जितेर महिलातर्फ भारोत्तोलनमा स्वर्ण जित्ने पहिलो नेपाली खेलाडी बनेकी थिइन् ।
अन्तिम दिन आइतबार नेपालले पदक तालिकामा थप १ रजत र १ काँस्य पदक थप्न सफल भयो । चार दिनसम्म पोखरामा चलेको भारोत्तोलनको अन्तिम दिन सागर भण्डारीले पुरुष १०९ किलो तौल समूहमा रजत पदक जित्न सफल भएका हुन् ।
सागरले राष्ट्रिय कीर्तिमानसहित रजत जिते । उनले स्न्याचतर्फ १२० र क्लिन एण्ड जर्कमा १५५ गरी २७५ किलो तौल उठाए । यसअघि सागको छनोट चरणमा आफ्नो नाममा रहेका तीनै विधाको कीर्तिमान सागरले तोडेका हुन् । त्यस्तै १०९ प्लस तौल समूहमा नेपालका लागि पुकारले काँस्यपदक जिते ।
उनले स्न्याचतर्फ १३२ र क्लिन एण्ड जर्कमा १४३ सहित २७५ किलो तौल उठाएका हुन् । पुकारको लागि स्न्याच विधामा राष्ट्रिय कीर्तिमान हो । नेपाललाई यअसघिको सागमा स्वर्ण पदक दिलाएका कीर्तिमानी खेलाडी कमलबहादुर अधिकारी भने काँस्यपदकमै सीमित भए ।
