शीर्ष स्थानमा रहँदै नेपाल साग फुटबलको फाइनलमा
काठमाडौं, २२ मंसिर । जारी १३ औँ दक्षिण एसियाली खेलकुद (साग)को पुरुष फुटबलमा नेपाल फाइनलमा प्रवेश गरेको छ ।
त्रिपुरेश्वरस्थित दशरथ रंगशालामा आइतबार भएको खेलमा बंगलादेशलाई १–०ले हराउँदै नेपाल फाइनलमा प्रवेश गरेको हो ।
राउन्ड रोविनको लिगको आधारमा भइरहेको खेलमा तालिका शीर्ष स्थानमा रहँदै नेपाल फाइनलमा प्रवेश गरेको हो । नेपालको जितसँगै १० अंक भएको छ । भने यसअघि नै फाइनल प्रवेश गरिसकेको भुटानको ९ अंक रहेको छ ।
बंगलादेशविरुद्ध नेपालले पहिलो हाफमा १–० को अग्रता लियो । खेलको मिडफिल्डर सुनिल बलको गोलमा अग्रता थिएको थियो । ११ औं मिनेटमा कप्तान सुजल श्रेष्ठको पासमा सुनिलले गोल गरेका हुन् ।
पहिलो हाफमा नेपालले केही अवसर पाएपनि गोलमा परिणत गर्न सकेन् । दोस्रो हाफमा भने नेपालले रक्षात्मक खेल खेल्यो ।
दोस्रो हाफ कुनै गोल हुन नसकेपछि १–० कै अन्तरमा खेल जित्यो । नेपालले खेलको शुरुवात देखि नै बंगलादेशलाई दवावमा राखेको थियो ।
नेपालले स्वर्णका लागि भुटानसँग खेल्नेछ । नेपालले भुटान यही साग ४–०ले हराएको थियो । भुटानले यसअघि शनिबारको खेलमा श्रीलंकालाई हराउँदै फाइनलमा स्थान पक्का गरेको थियो ।
दोस्रो खेलमा नेपालले श्रीलंकासँग १-१ गोलको बराबारी खेलेको थियो। तेस्रो खेलमा शनिबार नेपालले माल्दिभ्सलाई २-१ गोलले हराएकाे थियाे ।
