तीन बालिका बलात्कारको आरोपमा अमेरिकी नागरिक हाेटलबाटै पक्राउ
काठमाडौं, २३ मंसिर । तीन नेपाली बालिका बलात्कारको आरोपमा एक अमेरिकी नागरिक पक्राउ परेका छन् ।
पैसाको लोभ देखाउँदै नेपाली बालिका बलात्कार गरेको आरोपमा अमेरिकी नागरिक ४० वर्षीय ज्यासोन लोएड मुडीलाई केन्द्रीय अनुसन्धान ब्युरोले आइतबार त्रिभुवन विमानस्थलस्थित मेमोरियल गेस्ट हाउसबाट पक्राउ गरेको हो ।
मुडीलाई होटलको १०४ नम्बर कोठाबाट तीन बालिकासहित पक्राउ गरिएको व्यूरोले जानकारी दिएको छ । उनलाई आपत्तिजनक अवस्थामा पक्राउ गरिएको जनाइएको छ ।
५६७४७२५३५ राहदानी बाहक उनलाई जबरजस्ती करणी तथा जबरजस्ती उद्योग गरेको कसुरमा अनुसन्धान थालिएको ब्यूरोका प्रवक्ता प्रहरी उपरीक्षक बेलबहादुर पाण्डेले बताएका छन् । मुडी अमेरिकाको इलिनोइज राज्यको भएको जनाइएको छ ।
पाण्डेका अनुसार एक बालिकालाई उनले करणी गरेका थिए । दुई बालिकालाई करणी प्रयास गरेको खुलेको छ । बालिकाको उमेर ७, ९ र ११ वर्षको रहेको व्यूरोले जानकारी दिएको छ ।
मुडी बसेको कोठाबाट तीन थान राहदानी, ल्यापटप, चार थान मोबाइल, बैंकका एटिएम कार्डहरू, विश्वभाषा क्याम्पसबाट जारी भएको परिचय पत्रलगायत बरामद भएको छ ।
विश्वभाषा क्याम्पस पढ्ने मुडीले बालकहरूलाई कोठामा लगेर यौन दुराचार गर्ने गरेको सूचनापछि प्रहरीले होटलमा छापा मारेको जनाइएको छ ।
