फिफा वरियतामा महिला टोलीको सुधार
काठमाडौं, २८ मंसिर । १३ औं दक्षिण एसियाली खेलकुद (साग) को महिला फुटबलको रजत पदक विजेता नेपाली टोलीको फिफा वरियतामा सुधार भएको छ । विश्व फुटबल महासंघ (फिफा) ले हालै सार्वजनिक गरेको वरियतामा नेपाल ३ स्थान माथि उक्लेको छ ।
नेपाली महिला फुटबलको वरियता ९७ औं रहेको छ । यसअघि अक्टुबरमा भएको वरियतामा नेपाल १०० स्थानमा थियो । एसियाली खेलकुद राष्ट्रमा भने नेपाल २१ औं स्थानमा रहेको छ । पोखरा रंगशालामा भएको सोमबार भएको साग महिला फुटबलको फाइनलमा नेपाल भारतीय टोलीसँगै २-० ले पराजित भएको थियो ।
भारत बाहेक दक्षिण एसियाका सबै टोलीसँग हाबी रहँदै आएको नेपालले सागका तीनै संस्करणमा रजत पदकमा चित्त बुझाउनु परेको छ । यसअघिका दुवै संस्करणमा पनि नेपाल भारतसँग नै पराजित भएको थियो । सागमा नेपाल, भारत, श्रीलंका र माल्दिभ्सको सहभागिता रहेको थियो । राउन्ड रोविनका आधारमा भएको खेलमा श्रीलंका र माल्दिभ्सलाई हराएको नेपाल भारतसँग १–० ले पराजित भएको थियो ।
