हुन्डीदेखि सुन तस्करसँग एसएसपीको कनेक्सन
काठमाडौं, ३० मंसिर : अवैध हुन्डीबाट अरबौंको कारोबार भइरहेको भए पनि प्रहरीले आँखा चिम्लने गरेको छ । काठमाडौंको न्यूरोडमा जयरत्न बचत तथा ऋण सहकारी संस्थामार्फत् बच्चु पौडेलका दाजुभाइले हुन्डीको कारोबार गर्दै आएका छन् ।
त्यसमा अपराध अनुसन्धान महाशाखाका प्रमुख एसएसपी सहकुलबहादुर थापाले पनि संरक्षण गर्दै आएको आरोप छ । सिन्धुपाल्चोक उद्योग बाणिज्य संघका पूर्व अध्यक्ष तथा हाल नेपाल उद्योग बाणिज्य महासंघका केन्द्रीय सदस्य कमल श्रेष्ठले नै बच्चु पौडेललाई एसएसपी थापासँग समन्वय गराउने काम गरेका थिए ।
अरबौंको हुन्डी कारोबार गरी राष्ट्रको अर्थतन्त्र खोक्रो पार्ने पौडेलहरुको बारेमा आइजीपी सर्वेन्द्र खनाललाई पनि एसएसपी थापाले झुटो रिपोर्ट बुझाउँदै बेबकुफ बनाउँदै आएको स्रोत बताउँछ । उनीहरुको हुन्डी कारोबारमा संलग्लनता नभएको झुटो रिपोर्ट थापाले आइजीपीलाई दिंदै आएका छन् ।
बच्चु पौडेलका दाजुभाइ नै हुन्डी कारोबारमा संलग्न रहेका छन् । सिन्धुपाल्चोकका बच्चु पौडेल, धु्रव पौडेल र नारायण पौडेल दाजुभाइ हुन् । यी पौडेल दाजुभाइको पहिचान भनेको सुन, डलर र हुन्डीको अवैध कारोबारीका रुपमा हुँदै आएको छ । उनीहरु हुन्डी, सुन र डलरको कारोबारबाट रातारात अरबपति भएका भनेर सिन्धुपाल्चोकमा चिनिन्छन् । नारायण पौडेल केही बर्षअघि हङकङबाट ऊन आयात गर्ने भनेर एलसी खोल्ने गर्थे । डलर हङकङ पठाउने र उताबाट ऊन ल्याउँदैनथे ।
तर भन्सारबाट ऊन आयात भएको देखाउँथे । ऊन ल्याएको कीर्ते कागज र नक्कली सरकारी छापसहितको कागजात अपडेट गर्ने माष्टर माइन्डको धु्रव पौडेलका छोरा सुमन पौडेलले गर्ने गरेका थिए । यसरी करोडौं डलर एलसी खोली हङकङ पठाइसकेका नारायण पौडेलहरुका कारण विदेशी मुद्रा सञ्चितिमै असर परेपछि प्रहरीले अनुसन्धान सुरु गर्यो । र, नारायण बैंक हाताबाटै एलसी खोल्दा खोल्दै पक्राउ परेका थिए ।
अर्कैको नाममा ब्यापारीक फर्म खोली अबैध डलरको कारोबार गरेका पौडेल १५ महिनापछि जेलमुक्त भएका थिए । त्यसपछि पौडेल दाजुभाइ भूटानमा बसी सुनको अबैध कारोबारमा लागे । एक पटक उनीहरुको १८ किलो सुन लुटियो । तर प्रहरी लगाएर १० किलो लुटिएको सुन फेला पारेका थिए । प्रहरीलाई कुस्त घुस दिएर उनीहरुले १० किलो लुटिएको सुन लिन सफल भएको चर्चा हुने गरेको छ । हुन्डी, सुन र डलरको कारोबारी पौडेल दाजुभाइ पछिल्लो समयमा हाइड्रोपावरमा लगानी गरेका छन् ।
उनीहरुले हाइड्रोपावरमा कुन स्रोतबाट आर्जित रकम लगानी गरेका छन्, त्यसको खोजी राज्यले सम्पत्ति शुद्धिकरण अनुसन्धान विभागमार्फत् प्रभावकारी रुपमा हुने हो भने पुष्टी गर्न उनीहरुले नसक्ने सिन्धुपाल्चोकका एक ब्यापारी नै बताउँछन् । हाइड्रोपावरको उत्पादन क्षमता भन्दा पनि बढी बैंकका सीईओहरुसँग मिलेर ऋण समेत लिने गरेका छन् ।
सीईओहरुलाई पौडेलहरुले प्रभावमा पारी ऋण लिएकाले बैंक डुब्ने जोखिम पनि उत्तिकै छ । डलर, सुन र हुन्डीको कारोबारमा रहेका बदनाम पौडेल दाजुभाइ छानबिनबाट बच्नका लागि जुन पार्टी सत्तामा आयो, त्यही पार्टीको निकट हुने गरेका छन् । विगतमा बिष्णु खत्रीसँगै कांग्रेसमा रहेर २०७० को चुनावमा पनि तत्कालीन एमाले र माओवादी हराउन सबै खाले सहयोग गरेका उनीहरु अहिले नेकपाको निकट हुन पुगेका छन् ।
त्यसो सिन्धुपाल्चोकको तातोपानी नाकामा ब्यापार गर्ने पौडेलहरुको मात्र होइन, अधिकांश ब्यापारीको छवि राम्रो छैन । सिन्धुपाल्चोक उद्योग बाणिज्य महासंघको नेतृत्वमा रहेका तथा सिन्धु विकास बैंकका अध्यक्ष समेत रहेका राजेन्द्र श्रेष्ठका भाइ लागूऔषध कारोबार गर्दागर्दै तिब्बतमा पक्राउ परेपछि अहिलेसम्म चीनकै जेलमा सजाय भोगिरहेका छन् ।
उनी जेलमुक्त भएर नेपाल आएपछि राजेन्द्र श्रेष्ठदेखि बच्चु पौडेलका दाजुभाइसँग आक्रोशित छन् । उनीहरुले गर्दा नै आफू पक्राउ परेको तर आफू जेल परेपछि आफ्नो परिवारलाई कसैले पनि नहरेकोमा उनी आक्रोशित भएका छन् ।
राजेन्द्र श्रेष्ठले सिन्धु विकास बैंकको जग्गा खरिददेखि कर्जा लगानीमा कमिसन खाएको भनेर सञ्चालक समितिमै तीव्र विवाद भएर केहीले राजीनामा समेत दिइसकेका छन् । आजको साँघु साप्ताहिकमा समाचार छ ।
