ज्यान अमेरिका, जागिर जाजरकोट !
काठमाण्डौं : मान्छेलाई जिल्लामै बसेर जागिर खान त कम्तिको हैरानी छैन, अझ सात समुन्द्रपारी बसेर स्वदेशको जागिर खान कतिको सम्भव होला ? यो दुनियाँमा असम्भव भन्ने कुरा नै छैन भन्ने कुराको गतिलो उदाहरण बनेको छ– जाजरकोट जिल्ला अस्पतालका मेडिकल अधिकृत डा. निशराज बस्नेतको जागिर ।
जिल्ला अस्पताल जाजरकोटमा कार्यरत मेडिकल अधिकृत डा. निशराज बस्नेत एक वर्षदेखि अमेरिका बसेर जाजरकोटको जागिर खाइरहेका छन् । स्थानीय प्रशासनले छड्के अनुगमन गर्दा उनी जिल्ला अस्पतालमा नभई अमेरिकामा रहेको रहश्य फेला परेको हो । उनी गत वर्ष अमेरिका गएका हुन् । २०७३ सालको अन्त्यसम्म उनको साढे १९ दिन सञ्चित बिरामी बिदा थियो । २०७४ बैशाखदेखि यता दुई पटक अस्पताल आई हाजिर गरेर उनी पुनः अमेरिका फर्किएका थिए । यस वर्ष बैशाख २५ देखि जेठ ४ गतेसम्म ११ दिन हाजिर गरेर फर्किएका थिए । पुनः कार्तिक ६ गतेदेखि हाजिर भएका उनी २१ गतेसम्म १६ दिन जिल्ला अस्पतालमा बसेर काम गरेको हाजिरी रेकर्डमा उल्लेख छ ।
अन्य अवधिमा घरबिदा, सट्टा बिदा, काज, बाटो म्याद उल्लेख गरेर हाजिरी किताब भरेका छन् ।
घर बिदा लिइसकेर फेरि हाजिर भएपछि मात्र अर्को घर बिदाको बाटो म्याद लिन पाइन्छ । तर, डा. बस्नेतले कार्यालय प्रमुख डा. चाँदनी जैसवालसँगको मिलेमतोमा जथाभावी काज र बाटो म्याद स्वीकृति गराएको सहायक प्रमुख जिल्ला अधिकारी जनकराज शर्माले जानकारी दिएका छन् । साढे आठ महिना बितिसक्दासम्म जम्मा २७ दिन हाजिरी छ तर सट्टा बिदा (थप काम गरेको) मात्र दुई महिनाभन्दा बढी लिएको देखिन्छ’–सहायक प्रजिअ शर्माले भन्छन्–‘हामीले हाजिरी रजिष्टर झिकाएर अनुसन्धान गरिरहेका छौं । यो अनियमितता हो ।’ यसैबीच जिल्ला अस्पताल प्रमुख डा. चाँदनी जैसवालले काम नगरेको अवधिको पनि भत्ता लिइरहेको खुलासा भएको छ । उनी दन्तरोग सर्जन हुन् । दन्तरोगका बिरामी इमरजेन्सीमा भर्ना हुन नआउने भए पनि अन्य चिकित्सक सरह इमरजेन्सीमा रात्रि सेवा गरेको भन्दै दुई वर्षदेखि थप भत्ता लिइरहेको एक चिकित्सकले जानकारी गराएका छन् ।
निजामति सेवा ऐन र नियमावली अनुसार हाजिरी रेकर्ड नभएको पाइए विभागीय कार्वाही हुन्छ । सहायक प्रजिअ शर्माले भने–‘प्रारम्भिक अध्ययनबाट डा. बस्नेतले जागिर जोगाउनकै लागि सबै हर्कत गरेको पाइयो ।’ अघिल्लो बर्षको सञ्चित बिदा साढे १९ दिन र यस वर्षको प्रतिमहिना साढे दुई दिनका दरले पाकेको साढे २२ दिन घर विदाले कति धान्छ ।’ अस्पतालको दरबन्दी होल्ड गरेर अमेरिका बस्दा सेवा प्रवाहमा समस्या देखिएको उनले बताए । काम नगर्ने भए राजीनामा दिएर जान किने सहायक प्रजिअ शर्मा बताउँछन् । अस्पतालका निमित्त प्रमुख डा. कृष्ण शाहले स्थानीय प्रशासनले डा. बस्नेतका विषयमा सोधपुछ गरिरहेको र आवश्यक विवरण उपलब्ध गराइएको बताएका छन् ।
