प्रहरी अस्पतालकी आशा सिंह एआईजीमा बढुवा सिफारिस
काठमाडौं, १४ पुस । नेपाल प्रहरी अस्पताल महाराजगञ्जको प्रहरी अतिरिक्त महानिरीक्षक (एआईजी) मा डा.आशा सिंहलाई बढुवाका लागि सिफारिस गरिएको छ ।
प्राविधिक प्रहरी समूहअन्तर्गत स्वास्थ्य उप–समूहतर्फ रिक्त रहेको एआईजी पदमा डीआईजीका रूपमा सेवारत डा। सिंहलाई बढुवाका लागि सिफारिस गरिएको हो ।
रिक्त रहेको पदका लागि सर्वेन्द्र खनाल सदस्य–सचिव रहेको बढुवा समितिले डा। सिंहलाई एआईजीका लागि लोक सेवा आयोगको बढुवा तथा विभागीय परामर्श शाखालाई सिफारिस गरेको हो । गृहसचिव प्रेमकुमार राईको अध्यक्षतामा सोमबार बसेको बढुवा समितिको बैठकले सिंहलाई बढुवाका लागि सिफारिस गर्ने निर्णय गरेको हो ।
यसअघि ३ पुसमा प्रहरी अस्पतालकी प्रमुख डा। दुर्गा थापाले अवकाश पाएकी थिइन् । त्यसयता प्राविधिक एआईजीको पद रिक्त थियो । अस्पतालको नेतृत्वका लागि डा। सिंहसहित डीआईजी मिनराज पाठक र डा. सुमनराज श्रेष्ठ प्रतिस्पर्धामा थिए ।
