दामनको होटलमा आठ भारतीय बेहोस, हेलिकोप्टरबाट काठमाडौं ल्याइयो
काठमाडौं, ७ माघ । मकवानपुरको दामनस्थित एक होटलमा बेहोस अवस्थामा भेटिएका आठ भारतीय पर्यटकलाई हेलिकोप्टरबाट उद्धार गरी काठमाडौं ल्याइएको छ ।
मकवानपुरको थाहा नगरपालिका–४, दामनस्थित एभरेस्ट पानोरमा रिसोर्टमा बसेका आठ भारतीय पर्यटक मंगलबार बिहान बेहोस अवस्थामा भेटिएका थिए ।
नेपाल घुम्न आएका चार पुरुष र चार महिला होटलमा बेहोस अवस्थामा भेटिएको जिल्ला प्रहरी कार्यालय मकवानपुरलले जनाएको छ । प्रहरीका अनुसार बेहोस सबैलाई उपचारका लागि काठमाडौंको हेम्स अस्पताल पठाइएको छ । नेपाल घुम्न भारतको केरलाबाट १५ जनाको समूह नेपाल आएका थिए । तीमध्ये आठ जना एउटै कोठामा सुतेका थिए ।
प्रहरीका अनुसार, उनीहरू ग्याँस हिटर बालेर सुतेका थिए । यसकै कारण उनीहरू बेहोस भएको हुनसक्ने प्रहरीको आशंका प्रहरीको छ । घटनाबारे प्रहरीले थप अनुसन्धान अघि बढाइसकेको जनाएको छ ।