दामनको होटलमा बेहोस आठ भारतीयमध्ये एकको मृत्यु (अपडेट)
बेहोस अन्यलाई उपचारका लागि हेलिकोप्टरबाट काठमाडौं ल्याइयो
काठमाडौं, ७ माघ । मकवानपुरको दामनस्थित एक होटलमा बेहोस अवस्थामा भेटिएका आठ भारतीय पर्यटकमध्ये एक जनाको मृत्युु भएको छ ।
मकवानपुरको थाहा नगरपालिका–४, दामनस्थित एभरेस्ट पानोरमा रिसोर्टमा बेहोस अवस्थामा फेला परेका भारतीय पर्यटकमध्ये एक जनाको मृत्यु भएको भए पनि मृत्तकको नाम खुल्न बाँकी रहेको मकवानपुर प्रहरीले जनाएको छ ।
मंगलबार बिहान उनीहरु बेहोस अवस्थामा भेटिएका थिए । बेहोस फेला परेकाहरुलाई हेलिकोप्टरबाट उद्धार गरी उपचारका लागि काठमाडौं ल्याइएको छ । नेपाल घुम्न आएका चार पुरुष र चार महिला होटलमा बेहोस अवस्थामा भेटिएको जिल्ला प्रहरी कार्यालय मकवानपुरलले जनाएको छ ।
प्रहरीका अनुसार बेहोस सबैलाई उपचारका लागि काठमाडौंको हेम्स अस्पताल पठाइएको छ । नेपाल घुम्न भारतको केरलाबाट १५ जनाको समूह नेपाल आएका थिए । तीमध्ये आठ जना एउटै कोठामा सुतेका थिए ।
प्रहरीका अनुसार, उनीहरू ग्याँस हिटर बालेर सुतेका थिए । यसकै कारण उनीहरू बेहोस भएको हुनसक्ने प्रहरीको आशंका प्रहरीको छ । घटनाबारे प्रहरीले थप अनुसन्धान अघि बढाइसकेको जनाएको छ ।