विराटनगरमा युवकको विभत्स हत्या, अनुहार ढुङ्गाले किचिएकाले पहिचानमै समस्या
मोरङ, १४ माघ । मोरङको विराटनगर महानगरपालिका–४ र सुनसरीको दुहवी नगरपालिका–१२ बुकडोरीको सीमाना भएर बग्ने केसलिया खोला नजिकै एक युवको विभत्स रुपमा हत्या गरिएको अवस्थामा शव फेला परेको छ ।
हत्या गरेर फ्याँलिएको युवाको शव निर्वस्त्र फेला परेको छ । दुहवी–१२ बुकडोरीतर्फ हत्या गरेर खाल्डोमा फ्याँल्दै पराल र माटोले पुरेको अवस्थामा मंगलबार बिहान शव भेटिएको प्रहरीले जनाएको छ । अनुहारमा ढुङ्गा, इँटाले प्रहार गरिएका कारण शवको पहिचानमै समस्या भइरहेको प्रहरीले जनाएको छ ।
युवाको नाम, थर र वतन खोज्ने र हत्यारा पत्ता लगाउनका लागि खोजी कार्य तीब्र पारिएको सुनसरी प्रहरी प्रमुख एसपी यज्ञविनोद पोखरेलले बताएका छन् । युवाको शव भेटिएको जानकारी स्थानीयले प्रहरीलाई दिएका थिए । पोखरेलले शरीरमा लगाएका कुनै पनि कपडा नभएको र अनुहार तथा टाउको किच्याएर चिन्नै नसक्ने बनाएको अवस्थामा शव भेटिएको बताएका छन् ।
बाँस झ्याङ नजिकै रहेको घटनास्थलमा वरपर लतपतिएको रगतका टाटाहरु छन् । घटनास्थलबाट शवसँगै रगत लागेको एउटा इँटा र च्यातिएको मखलर (गलबन्दी) को टुक्रा फेला परेको एसपी पोखरेलले बताए ।
हत्या गरेर फ्यालिएका युवाको उमेर अन्दाजी २०–२५ वर्ष जस्तो देखिन्छ । शरीरका केही भाग सड्न लागेको अवस्थामा भेटिएको शव पोस्टमार्टमका लागि धरानको बीपी कोइराला स्वास्थ्य विज्ञान प्रतिष्ठान लगेर घटनाको अनुसन्धान गहन ढङ्गले थालिएको एसपी पोखरेलको भनाइ छ ।
उनले सड्न थालेका कारण घटना दुई–तीन दिनअघिको हुन सक्ने आशंका गरिएको बताए । ‘घटना हत्या नै हो । हत्या गरिएका युवाको पहिचान हुन सकेन,’ पोखरेलले भने, ‘प्रहरीले विभिन्न ठाउँमा पुगेर बुझ्ने काम गरिरहेको छ । शव भेटिएका युवाको पहिचान खुलेदेखि घटनाको वास्तविकतासम्म पुग्न सकिने थियो ।’ हत्या गरिएका युवाको पहिचान नै नभएका कारण घटनामा संलग्नका बारेमा पनि यकिन हुन नसकेको उनको भनाइ छ ।
घटनाको प्रकृति हेर्दा कुनै रिसिईबीका कारण केही न केही नियत राखेर हत्या गरे जस्तो देखिने उनले बताए । घटनास्थलबाट नजिकै दक्षिण–पश्चिममा विराटनगरबाट बुकडोरीतिर जाने पक्की सडक छ । ‘अति नै व्यस्त रहने सडक छेउमै शव भेटिएका कारण घटना दिउँसो नभई राति गराइएको हुनुपर्छ,’ एसपी पोखरेलले भने, ‘घटनाको प्रकृति हेर्दा घटनामा एक जनाको मात्रै संलग्नता हैन भन्ने देखिन्छ ।’