अनिश्चित बन्दै एकता संयोजन समितिको बैठक
काठमाण्डौं : आज (आइतबार) बस्ने भनिएको नेकपा एमाले र नेकपा माओवादी केन्द्रको एकता संयोजन समिति बैठक स्थगित भएको छ ।
माओवादी केन्द्रका अध्यक्ष पुष्पकमल दाहाल प्रचण्ड मौसम प्रतिकुलताका कारण काठमाण्डौं आउन नसकेपछि बैठक स्थगित भएको हो ।
केही दिनदेखि गृह जिल्ला चितवनमा रहेका प्रचण्ड खराब मौसमका कारण जहाज नचलेपछि त्यहीं रोकिएका थिए । प्रचण्डको निजी सचिवालयका अनुसार उनी आइतबार सडक मार्ग हुँदै काठमाण्डौं हिंडेका छन् । उनी काठमाण्डौं आएपछि राजनीतिक भेटघाट हुने जनाइएको छ । वाम एकताको पक्षमा रहेका नेपाली आजको वैठक स्थगित भएको खबरले निरास बनेका छन् ।
अध्यक्ष ओलीका प्रेस सहयोगी चेतन अधिकारी र माओवादी केन्द्रका अध्यक्ष प्रचण्डका प्रेस सहयोगी मनहरि तिमल्सिनाले प्रचण्डा काठमाडौं आएपछि भेटबारे टुङ्गो लाग्ने बताउँछन् । एमाले अध्यक्ष ओली आगामी २६ गते उपचारका लागि थाइल्याण्ड जाँदैछन् । त्यसअघि एकताका एजेण्डा तय गर्ने तयारीमा नेताहरू छन् । तर, वैठक बस्ने मिति तय गर्ने तर, फेरि स्थगित गर्ने कुराले अब चाँडै एकता समितिको वैठक बस्नेमा सर्वसाधरणले शंका व्यक्त गरिरहेका छन् ।