चीनमा कोरोनाबाट ज्यान गुमाउने ३६१ पुगे, १७ हजार बढी संक्रमित
एकै दिन ७५ जनाको गयो ज्यान, १० दिनमै हजार शैंयाको अस्पताल निर्माण
काठमाडौं, २० माघ । चीनमा कोरोना भाइरसबाट ज्यान गुमाउनेको संख्या ३६१ पुगेको छ । कोरोना भाइरसबाट संक्रमितको संख्या १७ हजार नाघिसकेको छ ।
हिजो (आइतबार) कोरोना भाइरसबाट चीनमा एकै दिन ७५ जनाको ज्यान गएको चीनको राष्ट्रिय स्वास्थ्य आयोगले पुष्टि गरेको बीबीसीले जनाएको छ । चीन बाहिर आइतबार फिलिपिन्समा पनि एक जनाको ज्यान गएको छ ।
यस्तै थप तीन हजारमा कोरोना संक्रमण भएको पनि चीनको राष्ट्रिय स्वास्थ्य आयोगले पुष्टि गरेको छ । चीन भन्दा बाहिर २४ देशमा गरी १५० जनामा कोरोना संक्रमण भएको पुष्टि भइसकेको छ ।
यातायात ठप्प, बजार सुनसान
कोरोना भाइरसका कारण चीनको वुहान शहरमा यातायात तथा बजार सबै बन्द छन् । वुहानभन्दा बाहिरका शहरहरुमा पनि अत्यावश्यक बाहेकका सेवाहरु बन्द गरिएका छन् । ६० लाख जनसंख्या रहेको वुहानको पूर्वी शहरमा कोरोनाको प्रकोप अझै बढ्न सक्ने भन्दै स्थानीय सरकारले चेतावनी दिएको छ ।
चिनिया सरकारी सञ्चारमाध्यमले वुहान शहरबाट सात लाखभन्दा धेरै मानिस वुहानमा नाकाबन्दी गर्नुअघि नै शहर छाडेर बाहिर गईसकेका बताएका बीबीसीले जनाएको छ ।
वुहानको पूर्वी शहर वेन्जुउमा बसोबास गर्नेहरूलाई खाना र अन्य अत्यावश्यक सामान किन्नका लागि एउटा परिवारको एक जनालाई दिनमा दुई पटक घरबाट बाहिर निस्कन अनुमति दिएको छ । बाँकी समय कोही पनि घर बाहिर निस्कन पाउँदैनन् ।
१० दिनमै हजार शैंयाको अस्पताल
कोरोना भाइरसको संक्रमण बढ्दै गएपछि चीनले १० दिनमा एक हजार शैयाको आस्पताल निर्माण गरेको छ । संक्रमितको संख्या दिनहुँ बढ्दै गएपछि चीनले त्यसको उपचारका लागि नयाँ अस्पताल सञ्चालन गरेको छ ।
नयाँ अस्पतालमा विशेषज्ञ, चिकित्सक र स्वास्थ्यकर्मीसहित एक हजार भन्दा बढी संलग्न हुने जनाइएको छ । यस्तै अन्य शहरहरुमा पनि नयाँ अस्पताल निर्माण हुने क्रममा रहेको र एक साताभित्रै सञ्चालनमा आउने चिनियाँ अधिकारीहरुलाई उध्रृत गर्दै अन्तर्राष्ट्रिय सञ्चारमाध्यमहरुले जनाएका छन् ।
चीनको वुहान शहरबाट गत डिसेम्बरमा शुरु भएको कोरोना भाइरसका कारण चीनमा मात्र मर्नेहरुको उच्च बन्दै गएको छ । अन्य देशमा पनि उक्त भाइरसको संक्रमण बढ्दै गएको छ ।
अधिकांश देशहरुले चीन भ्रमण गरेका नागरिकलाई आफ्नो देशमा प्रवेशमा रोक लगाएका छन् ।
यसैबीच हङकङका स्वास्थ्यकर्मीहरुले चीनसँगको सीमा नाका बन्द गर्न माग गरेका छन् । उनीहरुले बढ्दो संक्रमण फैलन नदिन सीमा नाका बन्द नगरिए हड्तालमा उत्रने चेतावनी समेत दिएका छन् ।
तर विश्व स्वास्थ्य संगठन डब्ल्युएचओका अधिकारीहरुले सीमा नाकामा चेकजाँचमा कडाइ गरेर आवागमनलाई सहज बनाउनुपर्ने बताएका छन् । उनीहरुले आवतजावत बन्द गरे सूचना आदानप्रदानमा समेत अफ्ठेरो हुने भन्दै आपतकालीन अवस्थामा सूचना आदानप्रदान सहज गराउन माग गरेका छन् ।
चीन सरकारले भाइरसबाट प्रभावितको संख्या १७ हजार रहेको बताए पनि हङकङले उक्त तथ्याङ्कमा आशंका व्यक्त गरेको छ । हङकङ विश्वविद्यालयका अधिकारीहरुले चीनमा ७५ हजारभन्दा बढी प्रभावित भए पनि सूचना लुकाइएको दाबी गरेका छन् ।
