महोत्तरीमा भव्यरुपमा मनाइयो महाशिवरात्रि पर्व
शुभम शाह
जलेश्वर(महोत्तरी), ९ फागुन । महाशिवरात्रि पर्वको अवसरमा प्राचीन तथा पुरातात्विक महत्व राख्ने महोत्तरी जिल्लाको जलेश्वरनाथ महादेवको मन्दिरलगायत जिल्लाका सबै शिवालयमा आज भक्तजनको भीड लागेको छ ।
महोत्तरीको जलेश्वर राजा जनकको राजधानी जनकपुरको दक्षिणद्धारको रुपमा रहेको पुराणमा वर्णित छन् भने पदम पुराणका अनुसार जलेश्वरनाथ महादेव स्वयं रुद्रबाट स्थापना भएको हो ।
रुद्रायतन्त्र ग्रन्थमा त्रेता युगमा राजा जनकको राज्यको सिमानाको चारैतिर सीताको रक्षाकवचको रुपमा स्वयं महादेवले पहरेदारी दिने भएकाले जनकपुरको पूर्वोतर कुनामा कपिलेश्वरनाथ, उत्तरमा क्षिरेश्वरनाथ, दक्षिणपूर्वमा कल्याणेश्वर र पश्चिम दक्षिण कुनामा जलेश्वरनाथ महादेव प्रतिष्ठित भएकाले यो महादेवको दर्शन गर्नाले चार देवस्थलको पुण्य मिल्ने विश्वास रहेकाले पनि यहाँ दर्शनार्थीको भीड लाग्ने गरेको छ ।
यहाँको शिवलिङ्ग बाहै्रकाल जलाशयमा रहने हुँदा जलेश्वर नाथ नामकरण भएको किम्वदन्ती रहेको छ । जलेश्वरनाथमा लागेको महाशिवरात्रि मेलालाई व्यवस्थित बनाउनका लागि जलेश्वरनाथ महादेव संरक्षण समितिद्वारा निःशुल्क स्वास्थ्य शिविर, आवास, खानेपानी र शान्ति सुरक्षाका लागि नेपाल प्रहरी, सशस्त्र प्रहरी र नेपाली सेनासमेत परिचालन गरिएको प्रमुख जिल्ला अधिकारी उमेशकुमार ढकालले बताए ।
पौराणिक मतअनुसार मिथिला नरेश जनकले स्थापना गरेको यस शिवालयको दर्शनमात्रले सम्पूर्ण पापकट्टि भई पुण्य कमाइने जनविश्वासका कारण भक्तजनको भीड लाग्ने गरेको हो ।
शिवरात्रिको अवसरमा भक्तजनको चापलाई दृष्टिगत गरी सबैले सुविधापूर्वक दर्शन गरुन भन्ने मनशायले यो पटक पर्याप्त व्यवस्था मिलाइएको शिव पूजा समारोह समितिका अध्यक्ष देवेन्द्र साहले बताए ।
महाशिवरात्रिको अवसरमा यहाँ धेरै भत्तजन निराहार व्रत बस्ने तथा अधिकांशले दर्शनपश्चात मात्र अन्न जल ग्रहण गर्ने परम्परा रहेको छ ।
शिवरात्रिका दिन मधेशका कृषकले राम्रो कृषि उत्पादन तथा सहकालको कामना गर्दै धानका वाला तथा सु–स्वास्थ्यका लागि भगवान आसुतोषलाई भण्टाको भार चढाउने परम्परा पनि रहेको मन्दिरका पुजारी उपेन्द्र पाठकले बताए ।
शिवरात्रिको पुण्य दिन आज जलेश्वर नाथ मन्दिर परिसरमा बालकको मुण्डन गर्ने प्रचलनसमेत रहेको छ । नेपाली सेना, नेपाल प्रहरी, सशस्त्र प्रहरीसहित स्थानीय व्यक्तिले मन्दिर भित्रको जल निकालेर दर्शन गर्न सहज बनाएका छन ।
शिवलिङ्ग समेत छोपिने गरी जलेश्रनाथ मन्दिरको गुफामा जल भरिएको हुन्छ । जल बाहिर निकाल्न कुनै पनि मेसिनरी सामग्री प्रयोग गर्न मिल्दैन । मन्दिरमा दर्शनका लागि शुक्रबार बिहान १ बजेदेखि सर्वसाधरणको प्रवेश खुला गरिएको थियो ।
जलेश्वरनाथ महादेवको दर्शन गर्न सर्वसाधारणसँगै विभिन्न राजनीतिक दलका प्रादेशिक तथा केन्द्रीय नेताहरु पनि पुगेका छन् । राष्ट्रिय जनता पार्टी (राजपा)को अध्यक्ष मण्डलका सदस्य राजेन्द्र महतोसहित सांसद सरिता साह पनि मन्दिर पुगे ।
प्रदेश सरकारका मन्त्री आभिराम शर्मा तथा प्रमुख जिल्ला अधिकारी तथा जलेश्वर नगरपालिकाका प्रमुख राम शंकर मिश्र लगायतले मन्दिरमा पूजा–आजा गरे ।
