दिल्ली हिंसा : प्रहरीसहित सातको मृत्यु, दर्जनौं घाइते
नयाँदिल्ली, १३ फागुन । भारतमा विवादास्पद नागरिकता संशोधन कानुनको विषयलाई लिएर भएको विरोध प्रदर्शनमा प्रहरीसहित सात जनाको मृत्यु भएको छ ।
सोमबार साँझसम्म तीन जना सर्वसाधारण र एक प्रहरीसहित चार जनाको मृत्यु भएको थियो । मंगलबार बिहानदेखि भड्किएको हिंसा अन्य तीन जनाको मृत्यु भएको जिटिबी अस्पताललाई उधृत गर्दै बिबिसीले जनाएको छ । मृतकको बारेमा थप विवरण भने सार्वजनिक गरिएको छैन । अस्पताल स्रोतका अनुसार प्रदर्शनमा दर्जनौं घाइते भएका छन् ।
अमेरिकी राष्ट्रपति डोनाल्ड ट्रम्प भारत भ्रमणमै रहेको समयमा सोमबार दिल्लीमा प्रदर्शन चर्किएको थियो । गत वर्ष पारित भएको नयाँ नागरिकतासम्बन्धि कानुनले भारतका मुस्लिमहरुलाई विभेद गरेको भन्दै त्यहाँ विरोध प्रदर्शन भइरहेको छ ।
मुस्लिम समुदायको बाहुल्यता रहेको दिल्लीको उत्तरपूर्वी क्षेत्रमा पछिल्लो समय आइतबारबाट प्रदर्शन सुरु भएको हो । प्रदर्शनकारीले एम्बुलेन्सलगायतका सवारीसाधनमा तोडफोड तथा आगजनी गरेका छन् ।
ट्रम्पसँग भारतीय प्रधानमन्त्री नरेन्द्र मोदीले वार्ता तयारी गरिरहँदा राजधानी दिल्लीका केही भागमा तनाव बढेको छ । एजेन्सी
