लोकतान्त्रिक गठबन्धन बनाउने कांग्रेसको निर्णय, छलफल थाल्यो
काठमाडौं: नेपाली कांग्रेसले आगामी प्रतिनिधिसभा र प्रदेशसभा चुनावका लागि लोकतान्त्रिक गठवन्धन बनाउने निर्णय गरेको छ । एमाले, माओवादी र नयाँ शक्तिले चुनावी तालमेलसँगै पार्टी एकता गर्ने सहमति गरे लगतै कांग्रेसले पनि लोकतान्त्रिक गठवन्धन बनाउने निर्णय गरेको हो ।
बुधबार बसेको कांग्रेस कार्यसम्पादन समितिको बैठकमा नेताहरुले अब लोकतान्त्रिक गठवन्धन बनाउनेको विकल्प नभएको धारणा राखेका छन् । ‘संघीय लोकतान्त्रिक गणतन्त्रलाई संस्थागत गरेर लैजान ध्रविकरण नहोस् भन्ने थियो’ कांग्रेस नेता अर्जुननरसिंह केसीले भने, ‘तर, अब लोकतान्त्रिक गठवन्धन अपरिहार्य भएको छ ।’
कांग्रेस केन्द्रीय कार्यसम्पादन समितिको बैठक चलिरहेका बेला प्रधानमन्त्री शेरबहादुर देउवाले बृहत् लोकतान्त्रिक गठबन्धन निर्माणका लागि राष्ट्रिय जनता पार्टी (राजपा), संघीय समाजवादी फोरम, राप्रपा, राप्रपा (प्रजातान्त्रिक)लगायत दलहरुसँग अपरान्ह ४ बजे छलफल गर्ने भएका छन् ।