कोरोना आशंकामा उपचाररत कपिलवस्तुका युवकको मृत्यु, नतिजा आउन बाँकी
कपिलवस्तु, २५ चैत । कपिलवस्तु जिल्ला अस्पतालको आइसोलेसनमा उपचाररत एक युवकको मृत्यु भएको छ । कोरोना (कोभिड–१९) भाइरस संक्रमणको आशंकामा उनको आइसोलेसनमा राखेर उपचार भइरहेको थियो ।
शुक्रबारदेखि अस्पतालको आइसोलेसनमा राखिएका कपिलवस्तु विजयनगर गाउँपालिका–२, जलैयाका ३० वर्षीय गोवर्धन भरको सोमबार राति मृत्यु भएको अस्पतालका मेडिकल सुपरिटेन्डेन्ट डा. किशोर बन्जाडेले जानकारी दिएका छन् । उनले युवकको मृत्युबारे अहिले थप कुरा बताउन नसकिने बताए ।
भरको स्वाब परीक्षणका लागि बुटवल पठाइएको छ, तर रिपोर्ट आउन बाँकी रहेको कपिलवस्तु अस्पतालका चिकित्सकले जानकारी दिएका छन् । रिपोर्ट आएपछि मात्र युवकको मृत्युबारे थप जानकारी दिन सकिने र शवलाई परिवारको जिम्मा लगाइने कपिलवस्तु अस्पतालले जनाएको छ ।
