सडक अलपत्र बनाएर ठेकेदार वेपत्ता
इलाम : काम अलपत्र बनाएर ठेकेदार वेपत्ता भएपछि इलामको सूर्योदय नगरपालिका र जोगमाई जोड्ने सडक अधूरो बनेको छ । ठेकेदार कम्पनीले सडक निर्माणमा लापर्वाही गरेपछि फिक्कल गुप्ती हुँदै नयाँबजार जोडिने सडक काम रोकिएको स्थानीय बताउँछन् । डेनमार्क सरकारको उन्नति समावेशी परियोजना अन्तर्गत १९ करोड ४७ लाखको लागतमा बन्दै गरेको १९ किलोमिटर दूरीको सडक अलपत्र भएपछि अहिले स्थानीय आक्रोशित बनेका छन् ।
१५ महिनामा काम सक्ने गरी २०७३ मंसिर १३ गते नागार्जुङ कन्सट्रकसन प्रा लि काठमाण्डौसँग सम्झौता भए पनि सम्झौता अनुसार काम नभएको माइजोगमाई गाउँपालिकाका अध्यक्ष जीतबहादुर राई बताउँछन् । अहिले निर्माणको जिम्मा लिएको ठेकेदार सम्पर्कमा नआइरहेको स्थानीयको भनाई छ ।
सम्झौता भएको एक बर्ष बितिसक्दा सडकको ५० प्रतिशत पनि काम नभएको र गुणस्तरको काम पनि नभएको स्थानीयको आरोप छ । ठाउँ–ठाउँमा सडक साँघुरो रहेको, निर्माण सामग्री कमसल भएको र स्तरीय सडक बन्न नसकेको अध्यक्ष राई बताउँछन् । यो सडकसँग माइजोगमाईवासीको सरोकार रहने भएकाले आफूहरु खबरदारीमा रहेको राईले बताए । ठेकेदार कम्पनीलाई मापदण्ड र सम्झौता अनुसार काम गर्न र अनुगमनका क्रममा भेटिएका कमजोरी सच्याउन माग गरिएको छ ।
सम्झौता अनुसार ६ दशमलव २५ मिटर चौडाईको १९ किलोमिटर सडक खण्डमा ग्राभेल आवश्यकता अनुसार पर्खाल र सबै क्षेत्रमा नाली निर्माण समेत गर्नुपर्ने उल्लेख भए पनि स्तरीय काम हुन नसकेको र सिमेन्ट गिटीलगायतका निर्माण सामग्रीको मापदण्ड अनुसार नभएको स्थानीय बताउँछन् । तर निर्माणको जिम्मा लिएको नागार्जुङ कन्सट्रकसन प्रालिले भने विभिन्न समस्याले काममा ढिलाइ भएको स्विकार्दै तत्काल सडक स्तरीय बनाउने बताएको छ ।