समय कि शासक अपराधी ?
काठमाण्डौंबाट
पैदलै घर हिँडेका
मजदुरहरूको पैतालाबाट
बगेको रगत हेरेर
तिम्रो मन बदलिएनछ
भाइरस भन्दा
भोकसँग पराजित
गरिबहरूको कहर सुनेर
तिम्रो ढुङ्गे मन गलेनछ
सवालको जवाफ होइन
आहतमा परेकालाई
राहत चाहिएको थियो
बदलामा
तिम्रो शासन झेलिरहे छु
शक्तिको दुरुपयोग हेरिरहेछु
सत्ताको जुवा खालमा
देशलाई च्याँखे थापेर
बेमौसमी राग सुनिरहे छु
सम्झना ताजै छ
तिमीले देखाएको
सपनाको जलपलाई
समृद्ध देशको मानचित्रमा
लिपपोत गरेर
खुसीले रमाएको थिए
तिम्रा रसिलो कुरा सुनेर
धेरै पटक हाँसेको थिए
वर्तमान
निरोको
बाँसुरी धुन सुनेर
जलिरहेको सहर सङ्गै
जलिरहेछु
९ बैशाख २०७७
ढोलाहिटी, ललितपुर
