फोहोरको थुप्रोमा सात दिनको शिशु !
काठमाण्डौं : काठमाण्डौंको चावहिल नजिकैको स्तुपा छेउको फोहोरका थुप्रोबाट प्रहरीले सात दिनको शिशुको उद्धार गरेको छ ।
जीवित अवस्थामा उद्धार गरिएको उक्त शिशुलाई उपचारका लागि अस्पताल लगिएको छ । बिहीबार बिहानै झोलाभित्र रोइरहेकी अन्दाजी ७ दिनकी शिशुलाई प्रहरी वृत गौशालाको टोलीले उद्धार गरेको हो ।
बिहान करीव सवा ४ बजे गस्तीमा रहेको टोलीले फोहोरको थुप्रोमा बच्चा रोएको सुनेपछि गएर हेर्दा नवजात शिशु फेला पारेको थियो ।
शिशुलाई उद्धार गरी उपचारका लागि काठमाण्डौं मेडिकल कलेज शिक्षण अस्पताल सिनामंगल पठाइएको प्रहरीले जनाएको छ । शिशु फाल्ने निर्दयी आमाको खोजी भइरहेको प्रहरीले जनाएको छ ।