कोरोना परीक्षणका क्रममा बौद्धमा झडप, मच्चियो ‘भागाभाग’
काठमाडौं, १६ जेठ । काठमाडौंको बौद्धमा कोरोना परीक्षणका क्रममा झडप हुँदा भागाभाग मच्चिएको छ ।
काठमाडौंको बौद्धस्थित सिमलटारमा कोरोना परीक्षणका पीसीआर जाँच किट कम भएपछि सिर्जित विवादपछि झडप भएको प्रहरीले जानकारी दिएको छ ।
प्रतिनिधिसभा सदस्य (सांसद) छक्कबहादुर लामा सो क्षेत्रमा रहेका हुम्लाकाबासीको कोरेना परीक्षणका लागि पाँच सय पीसीआर किटसहित पुगेका थिए ।
पीसीआर जाँच गर्न किट नपुग्ने भएपछि कसको परीक्षण गराउने भन्ने विषयमा विवाद हुँदा झडप भएको महानगरीय प्रहरी वृत्त बौद्धका प्रमुख डीएसपी नविन कार्कीले जानकारी दिएका छन् ।
खुल्ला चौरमा दुई पक्षबीच झडप हुँदा भागाभाग भएको छ । कोरोना परीक्षणको क्रममा झडप भएको भिडियो सामाजिक सञ्जालमा भाइरल भएको छ ।
भिडियोमा तीन युवाले निर्घात कुटाई खाएका छन् । नजिकै रहेको कुर्सी उचालेर समेत हानिएको छ । भिडियो खिच्ने पत्रकारलाई समेत गाली गरेको भिडियोमा देख्न सकिन्छ ।
झडपमा केही युवाहरु घाइते भएको जनाइएको छ । केही व्यक्तिलाई नियन्त्रणमा लिई घटनाबारे थप अनुसन्धान भइरहेको प्रहरीले जनाएको छ ।
