दैलेखमा मृत्यु भएका युवाको रिपोर्ट पोजेटिभ, कोेरोनाबाट ज्यान गुमाउने सात पुगे
काठमाडौं १७ जेठ । दैलेखको क्वारिन्टनमा आज (शनिबार) विहान मृत्यु भएका एक युवाको कोरोना रिपोर्ट पोजेटिभ (संक्रमित) आएको छ ।
दुल्लुस्थित विद्युत कार्यालयको क्वारेन्टिनमा शनिबार बिहान मृत्यु भएका युवकको रिपोर्ट पोजेटिभ आएको हो ।
दुल्लु–११ का ३५ वर्षीय पुरुषको विहान निधन भएको थियो । दिउँसो उनको कोरोना परीक्षण रिपोर्ट पोजेटिभ आएको छ । उनी भारतबाट आएर क्वारेन्टिनमा बसेका थिए ।
कर्णाली स्वास्थ्य विज्ञान प्रतिष्ठान जुम्लामा पीसीआर विधिबाट गरिएको परीक्षणमा युवकको नतिजा पोजेटिभ आएको सामाजिक विकास मन्त्रालयको स्वास्थ्य महाशाखा प्रमुख डा. लक्ष्मीनारायण तिवारीले जानकारी दिएका छन् ।
उनको स्वाब तीन दिनअघि पठाइएको थियो । उनी ७९ जना साथीसहित १० दिन अघिमात्र भारतको गुजरातबाट गाउँ फर्किएका थिए । यससँगै नेपालमा कोरोनाबाट ज्यान गुमाउनेको संख्या सात पुगेको छ ।