बेलुनको प्रचार सामग्रीले उत्तर र दक्षिण कोरियाबीच बढ्यो ‘तनाब’
दक्षिणको तटस्थ सीमा क्षेत्रमा सेना पठाउने उत्तर कोरियाको चेतावनी
काठमाडाैं, २ असार । उत्तर कोरियाली सेनाले दुई कोरियाली सीमाको दशगजा क्षेत्रमा प्रवेश गर्न तयारी अवस्थामा रहेको चेतावनी दिएको छ ।
दक्षिण कोरियाली सैन्य अधिकारीहरुले प्रचार सामाग्री पठाएसँगै उत्तरका सैन्य अधिकारीहरुले चेतावनी दिएको बीबीसीले उल्लेख गरेको छ । यसअघि उत्तर कोरियाका नेता किम जोङ उनकी बहिनी किम यो जोङले सीमाको सुरक्षाका लागि तयारी अवस्थामा रहन सेनालाई आदेश दिएको समाचार सार्वजनिक भएको थियो ।
दक्षिण कोरियाले बेलुनमार्फत उत्तर कोरियाली क्षेत्रमा प्रचार सामग्री पठाएसँगै दुई कोरियाको सम्बन्ध चिसिएको अन्तर्राष्ट्रिय समाचार संस्थाहरुले जनाएका छन् ।
दक्षिण कोरियाले अमेरिकासँगको सहयोगमा उत्तरका गतिविधि निगरानी गर्ने जवाफ दिएर आफूहरुलाई सशंकित बनाएको उत्तरको आरोप छ । सन् १९५० मा कोरिया युद्ध अन्त्य भएसँगै दुई कोरियाको सीमा छुटयाइएको थियो । उत्तर कोरियाले दक्षिण कोरियालाई तटस्थ क्षेत्र डीएमजेटमा सेना पठाउने चेतावनी दिएको छ ।
दक्षिण कोरियाली भूमिबाट उत्तर कोरियाली गतिविधि बढेपछि उत्तर कोरियाले ‘डिमिलिटराइज्ड जोन’ डीएमजेटमा सेना पठाउने धम्की दिएको हो । डिएमजेटले उत्तर र दक्षिण कोरियाको सीमानालाई छुट्याउँछ । यहाँ सेना तथा हतियार राख्न पाइँदैन । सन् १९५० पछि दुवै देशले यसलाई तटस्थ क्षेत्र मान्दै आएका छन् ।
तर पछिल्लो समय दक्षिण कोरियाको सीमाबाट उत्तर कोरियाको विरोधमा बेलुनहरु उडाइएपछि उत्तर कोरिया दक्षिणसँग रुष्ट बनेको छ । उक्त बेलुनहरुमा उत्तर कोरियाली सरकारको आलोचना गरिएको छ ।
यतिबेला भने उत्तरले आफ्ना सेनाहरु तटस्थ क्षेत्रमा जान तयार भएको बताएको छ । उत्तर कोरियाले डीएमजेटमा सेना पठाउने बताइरहँदा दक्षिण कोरियाले वार्ता र छलफलबाट समस्या हटाउनुपर्ने बताएको छ ।
सोमबार दक्षिणका राष्ट्रपति मुन जाय इनले वार्ताको विकल्प नभएको बताएका थिए । उत्तरले सीमामा सैन्य गतिविधि बढाउने बताएपछि दक्षिण कोरियाले अमेरिकी सेनासँग उत्तरको निगरानी गर्ने बीबीसीले जनाएको छ ।
उत्तर कोरियाले तटस्थ क्षेत्रमै सेना पठाउने चेतावनी दिएपछि यस विषय विश्वभर चासोको विषय बनेको छ । दक्षिण कोरियाको सीमानामा उत्तरविरुद्ध गतिविधि बढेको बताउँदै यतिबेला उत्तरले दक्षिणसँगको सबै सम्पर्क बन्द गरेको छ । एजेन्सी
