तान्जानियामा सामान्य परिवारका सानिनिउ लाइजर रातारात बने करोडपति
काठमाडौं, ११ असार । तान्जानियाका सामान्य परिवारका एक व्यक्ति रातारात करोडपति बनेका छन् ।
उनले बहुमूल्य पत्थर भेटेपछि रातारात करोडपति बन्ने सौभाग्य पाएका हुन् । तान्जानाइट नामक बहुमूल्य दुईवटा पत्थर फेला पारेपछि तान्जानियाका एक सामान्य नागरिक सानिनिउ लाइजर रातारात करोडपति बनेको बीबीसीले जनाएको छ ।
यो हाल फेला परेको अहिलेसम्मकै सर्वाधिक ठूलो तान्जानाइट भएको बताइएको छ । कुल १५ किलो तौल भएका दुई वटा पत्थर फेला पारेका सानिनिउ लाइजरले खानी मन्त्रालयबाट ४१ करोड नेपाली रुपैयाँ बराबरको रकम प्राप्त गरेको बताइएको छ ।
लाइजरले करोडौं प्राप्त गरेपछि भोज खुवाउने बताएका छन् । उनले गरीब परिवारका लागि विद्यालय खोल्ने इच्छा भएको समेत बताएका छन् । तान्जानाइट पत्थर उत्तरी तान्जानियामा मात्रै पाइन्छ र यो गहना बनाउन प्रयोग हुन्छ । एजेन्सी
