३० बर्से सेवावधि खारेज गर्ने खेल जारी
काठमाडौं, माघ १२ : प्रहरी महानिरीक्षक प्रकाश अर्यालसहितका १५ एआइजी र केही डीआइजीहरु नेपाल प्रहरीमा ३० वर्षे सेवावधिका आधारमा अवकाश हुने प्रावधान प्रहरी नियमावलीबाट हटाउने अन्तिम कसरतमा जुटिरहेका छन् ।प्रधानमन्त्री शेरबहादुर देउवालाई प्रभावमा पारी ३० बर्से सेवावधिको प्रावधान हटाउन ३ नम्बर प्रदेशका प्रमुख एआइजी केशरीराज घिमिरेदेखि ६ नम्बरका रणबहादुर चन्दसम्मको दौडधुप जारी छ । उनीहरू त्यसका लागि कार्यक्षेत्र छाडेर काठमाडौँमा केन्द्रित भएका छन् ।
आइजीपी अर्यालले मानवस्रोत विभागका प्रमुख एआइजी हेमन्त पाललाई प्रधानमन्त्री देउवालाई कन्भिन्स गर्न परिचालन गरेका छन् । अब बन्ने वाम गठबन्धनको सरकारले फेरि त्यो प्रावधानलाई अनुमोदन नगर्ने भएकाले आइजीपी अर्यालले एमालेलाई मिलाउन डीआइजी गणेश केसी र माओवादी केन्द्रका अध्यक्षलाई फकाउन एआइजी केशरीराज घिमिरेलाई लगाएको स्रोतले बताएको छ ।
स्रोतका अनुसार मधेशवादी दलहरूलाई समेत मिलाउनका लागि जुनियर तालिम केन्द्र भरतपुरका प्रमुख डीआइजी केदारमानसिंह भण्डारीलाई पनि काठमाडौँमै बोलाइएको छ । डीआइजी भण्डारी राष्ट्रिय जनता पार्टीका अध्यक्षमण्डलका सदस्य शरदसिंह भण्डारीका नाताले भाइ पर्दछन् ।
२०७४ माघ ११ को मन्त्रिपरिषद बैठकबाटै ३० बर्से सेवावधिको प्रावधान हटाउने पक्षमा प्रधानमन्त्री देउवा थिए । तर लोकसेवा आयोगले सहमति नजनाएपछि रोकिन पुगेको थियो । तर लोकसेवा आयोगका अध्यक्ष उमेश मैनालीलाई पनि मनाएर सरुवा गर्ने तारतम्य एआइजी हेमन्त पालहरूले बनाइसकेका छन् ।
३० वर्षे सेवावधिका कारण आइजीपी प्रकाश अर्यालसहितका १५ एआइजी आगामी चैत २८ गते अवकाश हुँदै छन् ।
गृहमन्त्री समेत रहेका प्रधानमन्त्री देउवा र उनकी पत्नी आरजुलाई करोडौं रुपैयाँ भेटीको प्रबन्ध गरी ३० वर्षे सेवावधि हटाउने अन्तिम कसरत भइरहेको चर्चा प्रहरीमा छ ।
आगामी चैत २८ गते ३० बर्से सेवावधिका कारण नेपाल प्रहरीका एआइजीहरु बमबहादुर भण्डारी, जयबहादुर चन्द, देवेन्द्र सुवेदी, पशुपति उपाध्याय, माधव जोशी, केशरीराज घिमिरे, विजयलाल कायस्थ अवकाश हुनेछन् । त्यस्तै एआइजीहरुको जम्बो टोलीका रणबहादुर चन्द, विजयराज भट्ट, मधु पुडासैनी, माधव नेपाल, मिङ्मार लामा, हेमन्त पाल, पंकज श्रेष्ठ र कमलसिंह बम पनि अवकाशमा पर्नेछन् ।
