मेलम्चीको पानी सुरुङ परीक्षणका लागि काठमाडौं पठाइयो
काठमाडौं, २१ असार । वहुप्रतिक्षित मेलम्ची खानेपानी आयोजनाले विधिवत रुपमा आज सुरुङबाट परीक्षणका लागि काठमाडौं पानी पठाएको छ ।
सिन्धुपाल्चोकका प्रमुख जिल्ला अधिकारी उमेशकुमार ढकालले मेलम्ची खानेपानी आयोजनाको मुहानमै पुगेर स्विच थिचेर पानी सुरुङमा पठाएका हुन् । सुरुङको परीक्षणका लागि आज काठमाडौं पानी पठाइएको हो ।
उक्त पानी सुरुङको अवस्था ठीक भएमा केही दिनभित्र काठमाडौंमा पानी पठाउने अवस्था रहने प्रजिअ ढकालले जानकारी दिएका छन् । मेलम्चीबाट काठमाडौंको सुन्दरीजलसम्म करिब २७ किलोमिटरको दूरी छ ।
सररकारले आर्थिक वर्ष २०७७–७८ को वार्षिक बजेटमार्फत मेलम्ची खानेपानी आयोजनाको निर्माण कार्य चालू आर्थिक वर्षभित्र सम्पन्न गरी आगामी आर्थिक वर्षको शुरुमै काठमाडौं उपत्यकामा पानी वितरण गर्ने जनाएको छ ।
उक्त कुराको औपचारिक रुपमा मेलम्ची खानेपानी आयोजनाले पत्रकार सम्मेलनमार्फत आज अपरान्ह जानकारी दिंदैछ । मेलम्चीको पानी प्रयोग गर्ने काठमाडौंबासीको वर्षौको सपना अझै पूरा हुन सकेको छैन । जसका कारण नागरिकमा निरासा पैदा भइरहेको छ ।
