ब्राजिली राष्ट्रपति बोल्सोनारोलाई कोरोना संक्रमण
काठमाडौं, २४ असार । ब्राजिली राष्ट्रपति जायर बोल्सोनारोले आफूलाई कोरोना भाइरस संक्रमण भएको बताएका छन् ।
लक्षण देखिएपछि बोल्सोनारो सोमबार जँचाउन अस्पताल गएका थिए । उनलाई ज्वरो र खोकीको समस्या रहेको ब्राजिली सञ्चारमाध्यमले जनाएका छन् । बोल्सोनारोले पटकपटक कोरोनाको जोखिमलाई बेवास्ता गर्दै आएका छन् । उनी लकडाउन विरुद्धको प्रदर्शनमा समेत सहभागी भएका थिए ।
मुलुकका स्वास्थ्य अधिकारीले महामारी रोक्न लकडाउन गर्नुपर्ने सुझाव दिइरहँदा बोल्सोनारोले यसलाई सामान्य रोगका रुपमा लिन आग्रह गर्दै आएका थिए । उनले यो ‘रुघाखोकी’ मात्र भएको बताएका थिए । गत केही महिनामा बोल्सोनारोका थुप्रै सहयोगी संक्रमित बनेका थिए ।
अमेरिकापछि कोरोनाबाट सबैभन्दा प्रभावित मुलुक हो, ब्राजिल । जहाँ हालसम्म १६ लाखभन्दा बढी मानिस संक्रमित भइसकेका छन् भने ६५ हजार बढीले ज्यान गुमाइसकेका छन् । एजेन्सी
