डब्ल्युएचओले भन्यो, ‘कोरोना महामारी थप खराब र भयावह बन्न सक्छ’
काठमाडौं, ३० असार । कोभिड–१९ का क्षेत्रमा विश्वका कयौं राष्ट्रहरुले प्रभावकारी कदम चाल्न नसकेको विश्व स्वास्थ्य संगठन (डब्ल्युएचओ) को ठहर छ ।
संगठनले यहि अवस्था रहे कोरोना भाइरसको विश्वव्यापी महामारी थप खराब र भयावह बन्दै जाने चेतावनी दिएको छ । डब्ल्युएचओ महानिर्देशक डा. टेडरोज आध्यनोम गेब्रेयेसोसले विश्वका कयौ राष्ट्रका सरकारले कोभिड–१९ का लागि प्रभावकारी कदम चाल्न नसकेको ठहर गर्दै भयावह स्थिति निम्तने चेतावनी दिएका छन् ।
संक्रमण रोक्न वा नियन्त्रणमा लिन प्रभावकारी कदम चाल्न नसकेका कारण विश्वका कयौं राष्ट्रहरुमा संक्रमण तीव्र गतिमा बढिरहेको महानिर्देशक टेडरोजले जानकारी दिए । कोभिड–१९ को इपिसेन्टर उत्तर तथा दक्षिण अमेरिका रहेको अवस्थामा अमेरिकामा स्वास्थ्य विज्ञ र राष्ट्रपति डोनाल्ड ट्रम्पबीचको तनाव बढ्दै गएका कारण पनि संक्रमण पनि बढ्दै गएको डब्ल्युएचओको ठहर छ ।
तर स्वास्थ्य विज्ञले भने लकडाउन खुकुलो पार्नेसहितका काम अति चाँडो हुँदा मानिसको जीवन जोखिममा परेको बताइएको छ । लकडाउन खुकुलो पारेकै कारण अमेरिकामा दिन प्रतिदिन कोरोना संक्रमितहरुको संख्या बढेको बताउँदै महानिर्देशक टेडरोजले कोरोना संक्रमित कम गर्ने मुख्य उपायमा लकडाउन पनि एक भएको बताउँदै संक्रमण फैलिएका देशहरुमा लकडाउन लागू गर्नुपर्ने सुझाव दिए ।
जेनेभामा हिजो गरिएको पत्रकार सम्मेलनमा डब्लुएचओका महानिर्देशक डा. टेडरोजले विश्वका नेताहरुले समान खालको रणनीति नअपनाउँदा समस्या उत्पन्न भएको जानकारी दिएका हुन् ।
साथै महानिर्देशक टेडरोजलेनले चाँडै नै कोरोना भाइरसविरुद्धको खोप उपलब्ध हुन्छ भन्नु वास्तविकतामा आधारित नरहेको पनि स्पष्ट पारेका छन् । खोप बनाउनका लागि अति तीव्र गतिमा काम भइरहेको तर त्यसका लागि समय लाग्ने उनले जाानकारी दिएका छन् ।
विश्वभर कोरोना भाइरसबाट संक्रमित हुनेको संख्या एक करोड ३५ लाख ३५ हजार भन्दा बढी पुगेको छ । यस्तै अहिलेसम्म ५ लाख ७५ हजार ५ सय भन्दा धेरैको मृत्यु भइसकेको छ । एजेन्सी
