त्रिनगर नाका हुँदै अझै दैनिक तीन सय हाराहारी नेपाली भारतबाट स्वदेश भित्रिंदै


प्रकाशित मिति : 1 August, 2020 6:50 pm

फाइल फोटो

कैलाली, १७ साउन । कैलालीको त्रिनगर भन्सार सीमा नाका भई भित्रिने नेपालीको उद्धार गर्ने काम अहिले पनि जारी छ ।

कोरोना भाइरसको सन्त्रासका कारण भारतका विभिन्न शहरबाट हिजोआज नेपाली नागरिक स्वदेश भित्रिने क्रम जारी रहेको जिल्ला प्रशासन कार्यालयका सूचना अधिकारी शिवराज जोशीले जानकारी दिए ।

उनले भन्सार नाकाबाट हालसम्म जम्मा एक लाख बढी नेपाली स्वदेश भित्रिएको बताए । ‘बन्दाबन्दीको शुरुका समयमा सीमा नाका हुँदै भित्रिने नेपालीको संख्या धेरै हुने गरेको भए पनि अहिले भने भित्रिनेको संख्या घट्दो क्रममा छ’, उनले भने, ‘आजभोलि दिनमा एक सयदेखि दुई–तीन सयको हाराहारीमा नेपाली भित्रिरहेका छन् ।’ शुरुका दिनमा सोही नाकाबाट एकै दिनमा छ हजारसम्म नेपाली भित्रिएको तथ्याङ्क छ ।

यसैगरी जिल्ला प्रशासन कार्यालयले बाहिरका जिल्लामा आवतजावत गर्न आकस्मिक अवस्था बाहेकका अन्य सवारी पास उपलब्ध नगराउने भएको छ ।

आफै काजकिरिया बस्न जाने वा किरिया सकेर घर फर्कने, सरकारी अस्पतालबाट सिफारिस गरिएका सिकिस्त बिरामी, सरुवा भई रमाना लिइ हाजिर हुन जाने कर्मचारी र निजका परिवार र हवाई टिकट सुरक्षित भई टिकट सूचीमा नाम भएका विदेश जानुपर्ने बाहेकका अन्य सवारी पास स्थगन गरिएको कार्यालयका सूचना अधिकारी जोशीले बताए ।

अन्तर जिल्ला आवागमनका लागि जारी गरिँदै आएका सवारी पास हाल लकडाउन खुलिसकेको र सार्वजनिक यातायातको सन्दर्भमा जारी नगर्न गृह मन्त्रालयबाट निर्देशन भए बमोजिम अन्य सवारी पास उपलब्ध नगराइने सूचना अधिकारी उनले जानकारी दिए ।

त्यस्तै यस कार्यालयले नियमितरूपमा सेवा प्रवाहमा केन्द्रित हुनुपर्ने बेला सवारी पासका कारण कार्यालयको सेवा प्रवाहमा असर परेकाले शुक्रबारबाट अर्को सूचना जारी नभएसम्मका लागि कार्यालयबाट अन्य कामका लागि सवारी पास जारी नगरिने बताइएको छ ।

प्रतिक्रिया दिनुहोस्