ट्राफिक प्रहरीमा कोरोना संक्रमण : एसएसपी ढकालसहित ३७५ जना क्वारेन्टिनमा
रामशाह पथस्थित बग्गीखाना ‘शिल’
काठमाडौं, १८ साउन । महानगरीय ट्राफिक प्रहरी महाशाखा रामशाहपथ (बग्गीखाना) का दुई जनालाई कोरोना संक्रमण पुष्टि भएको छ ।
दुई ट्राफिक प्रहरीमा कोरोना संक्रमण पुष्टि भएपछि एसएसपी भिमप्रसाद ढकालसहित ३७५ जनालाई क्वारेन्टिनमा राखिएको छ । गत शुक्रबार संक्रमण पुष्टि भएकाहरुलाई भने अस्पतालमा पठाइएको छ । आफूसहित ३७५ जना व्यारेक–व्यारेकमा रहेको जानकारी दिंदै महानगरीय ट्राफिक प्रहरी महाशाखा प्रमुख ढकालले भने, ‘अहिले महाशाखामा पूर्ण लकडाउन गरिएको छ ।’
उनले कोरोना पुष्टि भएकाहरुको सम्पर्कमा आएकाहरुलाई बाहिर आउ–जाउ गर्न बन्देज लगाइएको जानकारी दिए । आफूले अरुसँग भेटघाट बन्द गरेको उनले बताए ।
महाशाखा मातहत ट्राफिक प्रहरीको जनशक्ति एक हजार ५४५ जना छ । ३७५ जना क्वारेन्टिनमा गएपछि एक हजार १७० जना जनशक्ति ट्राफिक व्यवस्थापनका लागि खटाइएको छ ।
